එමෙන්ම ඔහු පවසා සිටියේ ඒ සඳහා ජනාධිපති රනිල් වික්‍රමසිංහ දී ඇති ඉලක්ක සපුරාලීම පිණිස සාම්ප්‍රදායික කෘෂි කර්මාන්තයෙන් ඔබ්බට ගොස් වැඩිවන ආහාර අවශ්‍යතාව සපුරාලීමට තාක්ෂණික පැකේජයක් හඳුන්වා දී ඇති බවයි.
කෘෂිකර්ම හා වැවිලි කර්මාන්ත අමාත්‍යාංශයේ ලේකම් ජානක ධර්මකීර්ති මේ බව සඳහන් කළේ ‘දෙවසරක ප්‍රගතිය සහ ඉදිරිය’ මැයෙන් ඊයේ (01) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.
එහිදී වැඩිදුරටත් ලේකම්වරයා මෙසේද පැවසීය.
‘කෘෂි කර්මාන්තයට නව තාක්ෂණය හඳුන්වාදීමේ ප්‍රතිලාභ මේ වන විටත් ලැබෙමින් පවතිනවා. සම්ප්‍රදායානුකූල කෘෂිකර්මාන්තයෙන් ඔබ්බට ගොස් වැඩි වන ආහාර අවශ්‍යතාව සපුරාලීම කෘෂිකර්ම අමාත්‍යාංශය සතු වගකීමක්. එය මේ වන විට සාර්ථකව කළමනාකරණය කරමින් සිටින බව කිව යුතුයි. මේ වන විට ගන්න වී අස්වනු ප්‍රමාණය දෙගුණ කර ගත යුතු බවට ජනාධිපති රනිල් වික්‍රමසිංහ මහතා දී ඇති ඉලක්කය ඉදිරි වගා කන්න හයේ සපුරා ගැනීමට අවශ්‍ය පියවර ගෙන තිබෙනවා. ඒ සඳහා කෘෂි නවීකරණ වැඩසටහන යටතේ අප විසින් තාක්ෂණික පැකේජයක් හඳුන්වා දී තිබෙනවා. තවද පුරන් කුඹුරු ඇතුළු සියලු කුඹුරු වී වගාවට යොදා ගැනීමටත් සෙසු වගා බිම් වෙනත් වගාවන්ට යෙදවීමටත් අප කටයුතු කර තිබෙනවා. මේ වන විට වී වගාවේ සාර්ථක ප්‍රතිඵල අත්කර ගනිමින් රටට අවශ්‍ය සහල් මෙට්‍රික් ටොන් අට ලක්ෂයක අස්වැන්නක් ලබාගෙන තිබෙන බව ද කිව යුතුයි. වී මිල සම්බන්ධයෙන් අමාත්‍යාංශයක් ලෙස මැදිහත්වීමට හැකියාවක් නෑ. නමුත් විවෘත ආර්ථිකයේදී මිල පවත්වා ගැනීම සාධාරණව සිදු වනු ඇති බව රජයේ බලාපොරොත්තුවයි. මිල ඉහළ යෑම වරක් දෙවරක් සිදු වුණාට රජයට මැදිහත් විය නොහැකි වුණත් එය දිගින් දිගටම සිදු වෙනවා නම් ඊට මැදිහත් විය හැකියි. මේ වන විට සහල් වර්ග දෙකක පමණක් තොග පවත්වා ගෙන ගියත් ඉදිරියේදී සියලුම සහල් වර්ගවල ආරක්ෂිත තොග පවත්වා ගනිමින් වෙළෙඳපොළට නිකුත් කිරීමට කටයුතු කරනවා.ඒ වගේම වියළි කලාපය පිළිබඳ වැඩි අවධානයක් යොමු කරමින් කෘෂිකර්ම දෙපාර්තමේන්තුවේ නිර්දේශ මත පුරන් කුඹුරු වෙනත් වගාවන්ට වෙන් කර දෙනවා. එය ආහාර නිෂ්පාදනයේ සාධනීය ඉදිරි පියවරක් වනු ඇති.
මේ වන විට කෘෂි කර්මාන්තය දේශීය සීමාවෙන් ඔබ්බට ගොස් විදේශීය වෙළෙඳපොළ ඉලක්ක කර ගෙන විශේෂ වැඩසටහන් ක්‍රියාත්මක කෙරෙනවා. ස්ට්‍රෝබෙරි, අඹ, අන්නාසි වැනි පලතුරු භෝග අපනයනයට වැඩි නැඹුරුවක් දක්නට ලැබෙනවා.
මීට අමතරව අස්වැන්නේ උච්ඡාවචනය සහ අස්වනු හානි පිළිබඳ අවධානය යොමු කරමින් දඹුල්ලේ ශීතාගාරයක් ස්ථාපිත කිරීමට ද නියමිතයි. යෝග්‍ය වගා පිළිබඳ ගොවියා දැනුම්වත් කළත් ඔවුන් ඒ ගැන නොතැකීම නොවන්නට මෙරට අවශ්‍යතාවට සරිලන නිෂ්පාදනයක් සිදු කරනවා. අප අමාත්‍යාංශය යටතේ ක්‍රියාත්මක ආර්ථික මධ්‍යස්ථානවල කළමනාකාරීත්වය හේතුවෙන් අස්වනු හානි 50%කින් පමණ අවම කර ගැනීමට හැකි වී තිබෙනවා. ගොවියාගේ සහායද ඇතිව අස්වනු ක්‍රමානුකූලව වෙළෙඳපොළට නිකුත් කිරීමේ ක්‍රමයක් සකස් කිරීමට අප තවදුරටත් කටයුතු කරමින් සිටිනවා.
