අද (03) කොළඹ දී පැවැත්වීමට නියමිත උද්ඝෝෂණයකට අදාළව මෙම නියෝග නිකුත් කර ඇත්තේ කොටුව මහෙස්ත්‍රාත් අධිකරණය සහ මාළිගාකන්ද මහෙස්ත්‍රාත් අධිකරණයයෙනි.
සමස්ත ලංකා ගොවිජන සම්මේලනය ඇතුළු කිරිගොවින් සුරැකීමේ මධ්‍යස්ථානය හා වෘත්තීය සමිති විසින් පැවැත්වීමට නියමිත උද්ඝෝෂණයකට අදාළ මෙම නියෝග නිකුත් කෙරිණි.
ඒ අනුව නාමල් කරුණාරත්න, ටී.බී සරත්, සුසන්ත කුමාර, සුමිත් අත්තනායක, බණ්ඩාර රඹුක්වැල්ල, සෝමසිරි රණසිංහ, නිලන්ත සිල්වා, සහ ඔවුන්ගේ සමාජිකයින් හා සහභාගි වන අය සඳහා මාර්ග කිහිපයකට ඇතුළුවීම හා අවහිර නොකරන ලෙස නියෝග කර තිබේ.
එම නියෝගයේ දැක්වෙන්නේ විරෝධතාකරුවන්ට කොටුව පොලිස් වසමේ ඕල්කට් මාවත ටෙලිකොම් හංදියේ සිට සෙරමික් හංදිය දක්වා ද, සෙරමික් හංදිය සිට NSA වටරවුම දක්වා මාර්ගය ද, NSA වටරවුමේ සිට බාලදක්ෂ මාවත දක්වා ගාලු මුවදොර වටරවුම ද අවහිර නොකරන ලෙසය.
මුදල් අමාත්‍යාංශය, ජනාධිපති ලේකම් කාර්යාලය, මහ බැංකුව, ජනාධිපති මන්දිරයට සංදේශ භාරදීම හා සාකච්ඡා පැවැත්වීමට ඉතා සුළු කණ්ඩායමකට වගකිව යුතු රජයේ නිලධාරියෙකුගෙන් නිත්‍යානුකූලව ලබා ගත් අවසරයක් මත පමණක් ඇතුළුවීමට බාධාවක් නොවන බව ද අදාළ අධිකරණ නියෝගයේ දැක්වේ.
මෙම නියෝගය නිකුත් කර ඇත්තේ පොදු හා පෞද්ගලික දේපොළවලට හානි නොකරන ලෙසටත්, අපරාධ නඩු විධාන සංග්‍රහයේ 106 (1) වගන්තිය ප්‍රතිපාදන ප්‍රකාරව අඥාවක් නිකුත් කර කෙරිණි.
එමෙන්ම නීතිවිරෝධී හැසිරීම්වලින් තොරව සාමකාමී උද්ඝෝෂණය කිරිමේ මූලික අයිතිවාසිකමට අධිකරණ නියෝගයෙන් කිසිදු බාධාවක් නොවන බව ද එහි සඳහන්ය.
-P.M
