ඔවුන්ට අනුව 2023 වසරේදී පමණක් ලොව පුරා මිලියන 733ක ජනතාවක් කුසගින්නට මුහුණපා ඇති අතර, එය සමස්ත ලෝක ජනගහනයෙන් සියයට 9කි.
ලෝක ආහාර සහ කෘෂිකර්ම සංවිධානය, ලෝක ළමා අරමුදල, ලෝක ආහාර වැඩසටහන, ලෝක සෞඛ්‍ය සංවිධානය සහ ජාත්‍යන්තර කෘෂිකර්ම සංවර්ධන අරමුදල යන එක්සත් ජාතීන්ගේ ආයතන 5ක් එක්ව මෙම වාර්තාව සකස් කර තිබුණි.
එහි වැඩිදුරටත් දැක්වුණේ යුද ගැටුම්, කාලගුණ විපර්යාස සහ සම්පත් බෙදීමේ අසමානතාව යන කරුණු මෙම තත්ත්වයට හේතුවී ඇති බවය.
අප්‍රිකානු කලාපයේ වැසියන් මෙම තත්ත්වයට වැඩි වශයෙන් මුහුණදෙමින් සිටින බවත් එහි සෑම පස් දෙනෙකුගෙන්ම අයෙක් කුසගින්නේ පසුවන බවත් වාර්තා වී තිබේ.
2023 වසරේදී ලෝක ජනගහනයෙන් සියයට 28.9ක් එනම් බිලියන 2.33ක් පමණ අර්ධ වශයෙන් හෝ බරපතළ ලෙස ආහාර අනාරක්ෂිතතාවයෙන් පීඩාවට පත්ව ඇතැයි ද එම වාර්තාවෙන් වැඩිදුරටත් අනාවරණ කෙරේ.
ඔවුන්ට අනුව, ආහාර අනාරක්ෂිතතාවට පත්වන පිරිස සීඝ්‍රයෙන් ඉහළගොස් ඇත්තේ කොවිඩ් -19 ගෝලීය වසංගතය ආරම්භවීමෙන් පසුවය.
- අද දෙරණ
