සිංගප්පූරුවේ නව රැකියා අවස්ථා ශ්‍රී ලාංකිකයන් සඳහා ලබා ගැනීම යටතේ විශේෂයෙන් සංචාරක කර්මාන්තයට අදාළව ආගන්තුක සත්කාරක සේවා, සෞඛ්‍ය සත්කාරක සේවා සහ කර්මාන්ත අංශ සඳහා ශ්‍රී ලාංකිකයන්ට අවස්ථා ලබා ගැනීම පිළිබඳ මේ සාකච්ඡාවේදී මූලිකව අවධානයට ලක්විය.
මෙහිදී ශ්‍රී ලංකාවත් සමඟ සමීප සහයෝගයෙන් කටයුතු කිරීමට සිංගප්පූරුවට ඇති බලවත් අභිලාසය මිනිස්බල ඇමැතිවරයා සඳහන් කළ අතර, තම රට නිරන්තරයෙන් වගබලා ගන්නේ නිපුණතා සහිත, කාර්යක්ෂම ශ්‍රමික ප්‍රජාවක් තෝරා ගැනීමට බව ද සඳහන් කළේය.
ඊට ප්‍රතිචාර දක්වමින් මහකොමසාරිස්වරයා ප්‍රකාශ කළේ ශ්‍රී ලාංකේය ශ්‍රම බළකායේ ඉහළ නිපුණතා මට්ටම මෙන්ම සිංගප්පූරුවේ රැකියා ප්‍රමිතීන් සපුරාලීම සම්බන්ධයෙන් ඔවුන්ට ඇති හැකියාව පිළිබඳ සිය විශ්වාසය පළ කළ හැකි බවයි. එමෙන්ම ක්ෂේත්‍රයේ ඇති තරගකාරීත්වය පිළිබඳ පෙන්වා දෙමින් මහකොමසාරිස්වරයා පෙන්වා දුන්නේ සිංගප්පූරු රැකියා වෙළෙඳපොළේදී ශ්‍රී ලාංකික ශ්‍රම බළකාය ඊට මුහුණ දෙන්නේ සාම්ප්‍රදායික නොවන රටක් වශයෙන් බවයි. එම කාණ්ඩයට අයත් අනෙකුත් රටවල් වන්නේ ඉන්දියාව, බංග්ලාදේශය, පිලිපීනය, තායිලන්තය සහ මියන්මාරයයි. සුදුසුකම් ලත් සාම්ප්‍රදායික රටවල් වශයෙන් සැලකෙන්නේ චීනය, මැලේසියාව යන රටවල්ය.
මහකොමසාරිස්වරයා සිංගප්පූරු බලධාරීන්ගෙන් වැඩිදුරටත් ඉල්ලා සිටියේ ශ්‍රී ලාංකික ශ්‍රම බළකාය වෙනුවෙන් නව අංශ යටතේ විශේෂයෙන් ශ්‍රමික වීසා බලපත්‍ර වර්ගීකරණය යටතේ අවස්ථා දෙන ලෙසයි. මෙහිදී සහයෝගිතාවයෙන් කටයුතු කිරීම මඟින් ශ්‍රී ලාංකිකයන් සතු ප්‍රවීණත්වය සිංගප්පූරුවේ කර්මාන්ත අංශය ද ඇතුළුව අනෙකුත් ක්ෂේත්‍රවලට ඵලදායිව යොදාගැනීමට හැකි වනු ඇති බව ද මහකොමසාරිස්වරයා පෙන්වා දුන්නේය.
-දිනමිණ
