නියෝජ්‍ය අධ්‍යක්ෂ ජනරාල්වරයා සඳහන් කරන්නේ ඕනෑම ආහාරයක් ප්‍රමාණය ඉක්මවා වැඩි වශයෙන් ආහාරයට ගැනීම ශරීරයට අහිතකර බවත් එවැනි ආහාරවේල් ගැනීම දියවැඩියාව, අධික රුධිර පීඩනය, ස්ථුලතාව හා බුද්ධි හීනතාව ආදියට හේතු වන බවත් මෙය වහාම අඩු කරගත යුතු බවත් පවසයි.
එමෙන්ම ඔහු පෙන්වා දෙන්නේ ආහාර ගැනීම පිළිබඳව ජනමාධ්‍ය හා සමාජ මාධ්‍ය ඔස්සේ දුර්මත පැතිරී යන බවත්ය.
සෞඛ්‍ය ප්‍රවර්ධන කාර්යාංශයේදී පසුගියදා (ජූලි 31) පැවැති මාධ්‍ය හමුවකදී නියෝජ්‍ය අධ්‍යක්ෂ ජනරාල් විශේෂඥ වෛද්‍ය ආනන්ද ජයලාල් මේ බව පැවසීය.
ආහාරවලට ඇතැම් ලෙඩ රෝග සුව කිරීමේ හැකියාවක් ඇති බවට විවිධ මත සමාජ මාධ්‍ය ඔස්සේ සංසරණය වුවත් එසේ ලෙඩ රෝග සුවකිරීමට ආහාරවලට කිසිදු හැකියාවක් නොමැති බවද හෙතෙම පැවැසීය.
පෝෂණය, ශරීර ක්‍රියාකාරීත්වයට අවශ්‍ය ශක්තිය හා ලෙඩ රෝගවලට ඔරොත්තු දීමේ හැකියාව ආහාරයකින් ගැනීමෙන් ප්‍රධාන වශයෙන් බලාපොරොත්තු වන බවත්, යම් යම් ලෙඩ රෝග සඳහා ඇතැම් ආහාර ගුණ බවට හා ඇතැම් රෝග සුව කිරීමට යම් යම් ආහාර සුදුසු බවට සිදුකරන ප්‍රචාරණයන් අසත්‍ය බවත් නියෝජ්‍ය අධ්‍යක්ෂ ජනරාල්වරයා සඳහන් කළේය.
එවැනි ප්‍රචාරණයන් සිදු කරන්නේ නම් විධිමත් සායනික දත්ත ඉදිරිපත් කළ යුතු බවත්, ඒ සඳහා සෞඛ්‍ය අමාත්‍යාංශයේ ප්‍රධාන ආහාර බලධරයාගේ අවසරය ලබාගත යුතු බවත් ඔහු කීය.
අනවසරයෙන් ප්‍රචාරණය කිරීම නීති විරෝධී වන බවත්, ඒ සම්බන්ධයෙන් නීතිමය කටයුතු කිරීමේ හැකියාව සෞඛ්‍ය අමාත්‍යාංශයේ ප්‍රධාන ආහාර බලධාරියාට පවතින බවත් හෙතෙම වැඩිදුරටත් සඳහන් කළේය.
