ආනයන හා අපනයන (පාලන) පනත යටතේ මුදල් ඇමැතිවරයා විසින් නිකුත් කරන ලද 2020 වසරේ අගෝස්තු මස 17 දිනැති අති විශේෂ ගැසට් පත්‍රය අනුව ඉඟුරු ආනයනයද තාවකාලිකව නතර කර ඇත.

මෙරට ගෘහස්ථ භාවිතය සඳහා වාර්ෂික වියළි ඉඟුරු අවශ්‍යතාවය මෙට්‍රික් ටොන් 5,167ක් බව අපනයන කෘෂිකර්ම දෙපාර්තමේන්තුව සඳහන් කරයි. මෙරට නිෂ්පාදනය කෙරෙන අමු ඉඟුරු ප්‍රමාණය වසරකට මෙට්‍රික් ටොන් 19,375කි. අමු ඉඟුරු මිල ගණන් නිරන්තරයෙන් වෙනස්වීම හේතුවෙන් එම වගාවෙන් ගොවීන් රැසක් ඉවත්වීම හේතුවෙන් මේ වනවිට වෙළෙඳපොළේ ඉඟුරු හිඟයක් නිර්මාණය වී ඇතැයි කෘෂිකර්ම හා වැවිලි කර්මාන්ත අමාත්‍යාංශය කියයි. මේ හේතුවෙන් ඉඟුරු කිලෝවක මිල රුපියල් 5,000ක් දක්වා ඉහළ ගොස් ඇතැයි අමාත්‍යාංශය සඳහන් කරයි.

රට තුළ පවතින අමු ඉඟුරු හිඟය හේතුවෙන් බීජ ඉඟුරු පවා මේ වනවිට පාරිභෝජනයට යොදා ගැනෙන බවත්, මේ නිසා ලබන වසරේ (2025) වගා කිරීමට බීජ ඉඟුරු නොමැතිවීමේ තත්ත්වයක් උද්ගතව ඇතැයිද කෘෂිකර්ම හා වැවිලි කර්මාන්ත අමාත්‍යාංශය කැබිනට් පත්‍රිකාවේ සඳහන් කර තිබේ.

රට තුළ පවතින ඩොලර් සංචිත රැක ගැනීමේ අරමුණින් දේශීය කර්මාන්ත සඳහා අවශ්‍ය ඉඟුරු තොග පමණක් ආනයනය කිරීම සුදුසු බවද, අමු ඉඟුරු ආනයනය ශ්‍රී ලංකා රජයේ වාණිජ (විවිධ) නීතිගත සංස්ථාව හරහා කිරීමට එහි එකඟත්වය ලැබී ඇතැයිද කෘෂිකර්ම හා වැවිලි කර්මාන්ත ඇමැති මහින්ද අමරවීර කැබිනට් පත්‍රිකාවේ සඳහන් කර ඇත.

-   අරුණ