IMF සමඟ ඇති ගිවිසුම අනුව කැබිනට් මණ්ඩලය මගින් අනුමත වූ මෙම වැටුප් වැඩි කිරීමේ යෝජනාව කුමන ආණ්ඩුවක් පැවතුනත් ක්‍රියාත්මක කළ යුතු බව ද ඇමතිවරයා පවසයි..
මේ අනුව, මුල්‍ය කළමනාකරණයේදී රාජ්‍ය ණය පාලන පනත, මූල්‍ය කළමනාකරණ වගකීම් පනත, ආර්ථික පරිවර්තන පනත, නව ශ්‍රී ලංකා මහ බැංකු පනත, සහ දූෂණ විරෝධී පනත යන පනත්වල ප්‍රතිපාදන අනුව රජය කටයුතු කළ යුතුය.
ඇමැතිවරයා සඳහන් කරන මෙම කාරණය අනුව බරපතල අර්බුදයකට පත්ව ඇත්තේ විපක්ෂ කණ්ඩායම්ය.
සජබය සහ ජාජබය විසින් තමන් බලයට පැමිණිය හොත් IMF ගිවිසුම වෙනස් කරන බවටත්, එහි එකඟතා අනුව වන වර්තමාන බදු පැනවීම වෙනස් කර ලිහිල් කරන බවත් ආර්ථික ප්‍රතිපත්ති හා අණ පනත් වෙනස් කරන බවත් මේ වන තෙක්ම සහතික කර පවසමින් තිබිණි. යම් ලෙසකින් ඒකපාර්ශ්විකව එවැනි වෙනස් කිරීමක් සිදු කළහොත් මුලින්ම IMF ගිවිසුම කඩ කිරීමක් වන අතර එම සංවිධානය රටට ලබා දෙන සහනයන් නතර කරනු ඇත. ඒ අනුව යෝජිත රාජ්‍ය සේවකයන්ට වැටුප් වැඩි කිරීමේ කැබිනට් තීන්දුව ද අහෝසි වේ.
මෙම වසර තුළ අපේක්ෂිත රාජ්‍ය ආදායම රාජ්‍ය සේවයේ වැටුප් වැඩි කිරීමකට ප්‍රමාණවත් නැත. එම නිසා මෙම වසරේ වැටුප් වැඩි කිරීමක් කිසිසේත් සිදු කළ නොහැකි බව රු 25,000 ක වැටුප් ඉල්ලා ජවිපෙ මූලිකත්වයෙන් සිදු කළ වර්ජනය දියත්ව තිබු මොහොතේ ජනාධිපති රනිල් සෘජුව සඳහන් කර තිබිණි. එමෙන්ම වැටුප් වැඩි කිරීමක් සඳහා අමතර බදු පැනවීමක්ද සිදු කිරීමට සිදු වන බව ආර්ථික විශ්ලේෂකයන් පවා පෙන්වා දී තිබිණි.
ඒ අතර පසුගියදා රාජ්‍ය සේවක වැටුප් 2025 ජනවාරියේ සිට වැඩි කිරීමට රජය තීරණය කිරීම විවාදාත්මක විය. ඒ සඳහා රජයට ආදායම් ලැබෙන්නේ කෙසේ දැයි ප්‍රශ්නකාරී විය. ඇමැති බන්දුල සිදු කර ඇති ප්‍රකාශයෙන් එම ගැටළුව රජය විසඳා ගෙන තිබෙන ආකාරය පැහැදිලිය. නමුත් විපක්ෂය කිසි විටෙක තමන් මේ සඳහා මුදල් සොයා ගන්නා ආකාරය පැහැදිලි කර නොමැත.
මේ අනුව විපක්ෂ කණ්ඩායමක් බලයට පැමිණියත් රාජ්‍ය සේවක වැටුප් වැඩි කිරීම සඳහා බදු වැඩි කිරීමකින් හැර අවශ්‍ය අරමුදල් සපයා ගැනීමේ හැකියාවක් කිසිසේත්ම නැත.
එම තත්වය තුළ ඔවුන්ටත් සිදු වන්නේ IMF ගිවිසුම් අනුව කටයුතු කරමින් වැටුප් වැඩි කිරීම වෙනුවෙන් එම අරමුදල් අත්පත් කර ගැනීමය. ඒ අනුව විපක්ෂයට කටමැත දෙඩවීම් පසෙකලා තව දුරටත් IMF ගිවිසුම අනුව කටයුතු කිරීමට සිදු වේ.
ඔවුන් දැනටමත් රාජ්‍ය සේවක වැටුප් වැඩි කරන බවට පොරොන්දු දී ඇති බැවින් රජයට මුදල් නොමැති බව පවසා ඒ මඟ හැරිය නොහැක. ඒ වෙනුවෙන් වැඩ වර්ජන මෙහෙය වීමද ඔවුන් සිදු කර තිබිණි. එසේම එම වැඩ වර්ජන රැල්ල අත් හිටවූවේ ද මේ විපක්ෂ බලයට පැමිණීමෙන් පසුව ඒ ලබා දෙන පොරොන්දුව මතය. ඒ අතර IMF ගිවිසුම වෙනස් කර ජනතාව පීඩාකාරී ආර්ථිකයෙන් මුදවා ගන්නා බවට බවට සපත කිරීමද කර ඇත.
මේ අනුව විපක්ෂය දැන පත්ව ඇත්තේ සිටින්නේ ගෙදර ගියොත් අඹු නසි, මඟ සිටියොත් තෝ නසී තත්වයකටය. දැන් රාජ්‍ය සේවක වැටුප් ගෙවීම වෙනුවෙන් IMF ගිවිසුම රැකීමට විපක්ෂයට සිදු වන අතර එයින් ඉවත් වුවහොත් සජබ හෝ ජාජබ ආණ්ඩුවක පැවැත්ම රාජ්‍ය සේවකයන් විසින් තීරණය කරනු ඇත. විපක්ෂය මේ හඹකේ සිර කළේ ජනාධිපති රනිල්ය. නමුත් ඒ රටේ අනාගත අභිවෘද්ධිය වෙනුවෙනි. රාජ්‍ය සේවකයා වෙනුවෙනි.
මේ අනුව ඉදිරි ජනාධිපතිවරණයට පෙර මෙම ගිවිසුමෙන් ඉවත් වෙනවාද නැද්ද යන්න ගැන මේ විපක්ෂ පක්ෂ දෙක රාජ්‍ය සේවකයාට පැවැසිය යුතුය. ඔවුන්ගේ ඡන්දය ඒ අනුව ලැබෙන නොලැබෙන බව තීරණය වෙනු ඇත.
