පසුගිය බිනර පුරපසොලොස්වක පොහෝය දිනයේ ඌව පළාත් මැතිවරණ අපේක්ෂකයින් විශේෂයෙන් මොනරාගල අපේක්ෂකයින් සිය මනාප අංකය සහ ලකුණ ඡායාරූපය සහිතව පන්සල්වල සිල් සමාදම් වූ උපාසක උපාසිකාවන්ට සිල් රෙදි බෙදා දීම වතුරු බෝතල් බෙදාදීම ආදිය සිදුකළ අතර මේ වනවිට එයට මහා සංඝරත්නයෙන් විරෝධය එල්ලවෙමින් තිබේ.ජාතික සංඝ සම්මේලනයේ භික්ෂූන් වහන්සේලා පවසන්නේ ආගම තම මැතිවරණ ප්‍රචාරක කටයුතු වෙනුවෙන් යොදාගත් එම අපේක්ෂකයන්ට ඡන්දය ලබාදීමෙන් වලකින ලෙසයි.
ඌවේ අබෞද්ධයන්ටත් සිල් රෙදි බෙදලා
මේ අතර, මැතිවරණ කොමසාරිස් මහින්ද දේශප‍්‍රිය මහතා කොළඹදී මාධ්‍ය අමතමින් කියා සිටියේ, ඌව පළාතේ අබෞද්ධයන්ටත් මනාප අංක ලකුණු කළ සිල් රෙදි බෙදා දී ඇති බවයි.
සංඝයා වහන්සේට දන් පිරි නැමූ ඇතැමුන් වතුර බෝතලේ පවා මනාප අංකය සටහන් කර තිබූ බව ද ඔහු පැවසිය.
එමෙන්ම මැතිවරණ කොමසාරිස්වරයාද පවසා සිටියේ පොහෝය දිනයේ දානය පිරිනැමීම සඳහා යොදාගත් බත් පාර්සල්වලද අපේක්ෂකයන්ගේ ඡන්ද ලකුණු තිබූ බවයි. "බත් ඇටේ විතරයි ඡන්ද ලකුණු තිබුනේ නැත්තේ..." යයි ද මැතිවරණ කොමසාරිස්වරයා පැවසිය.
