ජාත්‍යන්තර මූල්ය අරමුදලේ සන්නිවේදන ප්‍රධානී ජුලී කොසැක් පවසන පරිදි, ශ්‍රී ලංකාවේ ඩොලර් බිලියන 2.9 ක විස්තීරණ අරමුදල් පහසුකම පිළිබඳ අරමුදලේ තුන්වන සමාලෝචනය, නියමිත කාලසටහන සමඟ ඔක්තෝබර් මැද භාගයේදී සැලසුම් කර ඇත. ඒ අනුව ප්‍රධාන ආර්ථික ප්‍රතිසංස්කරණ ඉදිරියට ගෙන යාමේ අවශ්‍යතාවය සහ ආර්ථික ප්‍රගතිය තක්සේරු කිරීම සඳහා IMF කණ්ඩායමක් ඔක්තෝබර් 2 අඟහරුවාදා ශ්‍රී ලංකාවට පැමිණීමට නියමිතය.
ජනාධිපති අනුර කුමාර දිසානායක,සිය පළමු රූපවාහිනී කතාවේදී ජාමූඅ සමග සාකච්ඡා කඩිනමින් නැවත ආරම්භ කිරීමට තම කැපවීම අවධාරණය කළේ, රටේ බරපතලම ආර්ථික අර්බුදයකින් රට සම්පූර්ණයෙන් ගොඩගැනීම සඳහා මෙම සාකච්ඡා වල වැදගත්කම අවධාරණය කරමිනි.
IMF හි ඉදිරි කාර්ය මණ්ඩල සංචාරයෙන් පසුව ශ්‍රී ලංකාවේ ප්‍රගතිය තක්සේරු කරනු ඇති අතර එය නොවැම්බර් මාසයේදී අපේක්ෂා කරන මීළඟ මූල්ය වාරිකය ලබා දීම තීරණය කරනු ඇත.
මේ අතර, ශ්‍රී ලංකාවේ ණය ප්‍රතිව්‍යුහගත කිරීම අවසන් වෙමින් පවතින බව මහ බැංකු අධිපති නන්දලාල් වීරසිංහ අනාවරණය කළේ රජය වත්මන් ණය තිරසාර විශ්ලේෂණ (DSA) අනුගමනය කරන්නේ නම් සති 6-8ක් ඇතුළත බැඳුම්කර හුවමාරුවක් අපේක්ෂා කරන බවයි.
ඩීඑස්ඒ තීරණ ගැනීමේදී මහ බැංකුව සම්බන්ධ නොවූවත්, පවතින ඩීඑස්ඒ රාමුව නැවත සාකච්ඡා කරනවාද නැතිනම් පවත්වාගෙන යනවාද යන්න තීරණය කළ යුත්තේ මුදල් අමාත්‍යාංශය බව ඔහු පැවසීය.
ප්‍රතිව්‍යුහගත කිරීමේ ඉතිරි පියවර අතරට ජාත්‍යන්තර සහ දේශීය බැඳුම්කර හිමියන් සහ ආසියානු සංවර්ධන බැංකුව (ADB) සමඟ ගිවිසුම් අවසන් කිරීම ඇතුළත් වේ. පොලී අඩු කිරීම් සහ කල්පිරීමේ දිගු කිරීම් වැනි ණය සහන ක්‍රියාමාර්ගවල සංසන්දනාත්මක බව ඇගයීමට ලක් කළ පසු, අපේක්ෂිත කාල රාමුව තුළ බැඳුම්කර හුවමාරුවකට යා හැකිය.
සියලුම කොන්දේසි සපුරා ඇත්නම්, බැඳුම්කර හුවමාරුව සති හයක් හෝ අටක් ඇතුළත සිදුවනු ඇත. ශ්‍රී ලංකාවේ මූල්ය ස්ථාවරත්වය සඳහා ණය ප්‍රතිව්‍යුහගත කිරීම සම්පූර්ණ කිරීම අත්‍යවශ්‍ය බව ආචාර්ය වීරසිංහ මහතා පැවසීය.
ප්‍රගතිය තිබියදීත්, IMF නිලධාරීන් අනතුරු අඟවා ඇත්තේ රට තවමත් අවදානම් තත්ත්වයක පවතින බවත්, තිරසාර ප්‍රකෘතියක් සඳහා වත්මන් ජයග්‍රහණ ඉදිරියට පවත්වා ගැනීම ඉතා වැදගත් බවත් ය.
මේ අතර NPP ආර්ථික කවුන්සිලයේ ප්‍රධානී මහාචාර්ය අනිල් ජයන්ත පැවසුවේ ජාත්‍යන්තර මූල්ය අරමුදලේ වැඩසටහන කඩාකප්පල් නොකර ඉදිරියට ගෙන යන බවත් පසුගිය රජයේ ප්‍රවේශයට වඩා වෙනස් ශක්තිමත් මූල්ය ඒකාග්රතාවයක් සහතික කරන ආදායම් පියවරයන් ඉදිරිපත් කරමින් වැඩසටහනේ අරමුණු සපුරාලන බවත්ය.
එසේම, මහාචාර්ය ජයන්ත කියා සිටියේ, නව රජය මහජන අවශ්‍යතා සැලකිල්ලට ගනිමින් රාජ්‍ය ව්‍යවසායයන් ප්‍රතිව්‍යුහගත කරන බවයි. හෝටල් වැනි සමහර රාජ්‍ය ව්‍යවසායන් ඉවත් කිරීමට නව රජය විවෘත බව ඔහු පැවසීය.
පාලන නිර්දේශ සම්පූර්ණයෙන් ක්‍රියාත්මක කිරීම සහ බදු පරිපාලනය පරිවර්තනය කිරීම සම්බන්ධව පසුගිය රජය විසින් ප්‍රමාද කරන ලද හෝ මෙතෙක් ලබා නොදුන් සමහර ඉලක්ක කඩිනම් කිරීමට රජය සැලසුම් කර ඇති බවත් මහාචාර්ය ජයන්ත පැවසීය.
එසේම මේ මස මුලදී, පසුගිය රජය බැඳුම්කර හිමියන් සමඟ ණය ප්‍රතිව්‍යුහගත කිරීම පිළිබඳ ‘ප්‍රතිපත්තිමය එකඟතාවයකට පැමිණි ඇති බවත් ඒ අනුව නව රජයට අවශ්‍ය වන්නේ ප්‍රමාදයකින් තොරව ණය ප්‍රතිව්‍යුහගත කිරීමේ ගිවිසුමක් අත්සන් කිරීමට බවත් මහාචාර්ය ජයන්ත පැවසීය.
