පසුගිය රජය රජය සතු ව්‍යවසාය ප්‍රතිව්‍යුහගත කිරීමේ ඒකකය (State Owned Enterprises Restructuring Unit) මඟින් ශ්‍රී ලංකා ඉන්ෂුවරන්ස්, ශ්‍රී ලංකන් එයාර්ලයින්ස්, ශ්‍රී ලංකා කජු සංස්ථාව සහ ශ්‍රී ලංකා ටෙලිකොම් වැනි රාජ්‍ය වාණිජ ව්‍යාපාර 130 ක් ප්‍රතිව්‍යුහගත කිරීම සඳහා හඳුනාගෙන තිබිණි. ඇතැම් ආයතන සම්බන්ධයේ පියවර ගෙන ද තිබිණි.
ජනාධිපති අනුර කුමාර දිසානායක මහතා ප්‍රමුඛ නව රජය බලයට පත්වීමත් සමඟම එම ඒකකයේ අධ්‍යක්ෂ මණ්ඩලය ඉල්ලා අස්විය.
අදාල වාර්තා අනුව මෙම ඒකකය පිළිබඳ තීරණය ගැන විමසූ විට නව රජයේ ඉහළ නිලධාරියෙකු පවසා තිබුණේ එම ඒකකය සම්බන්ධයෙන් හෝ රජය සතු ඕනෑම ආයතනයක් ප්‍රතිව්‍යුහගත කිරීම සම්බන්ධයෙන් ඕනෑම තීරණයක් මහ මැතිවරණය අවසන් වූ පසුව ගන්නා බවයි.
එම නිලධාරියා පැවසුවේ ජාතික ගුවන් සේවය විකුණා නොදමන නමුත් රජය විසින් මෑතකදී පත් කරන ලද නව කළමනාකාරීත්වය සමඟ සාකච්ඡා කර නව සංවර්ධන ආකෘතියක් සකස් කරන බවයි. ඒ අතර ශ්‍රී ලංකා ත්‍රිපෝෂ සමාගම වැනි ලාබ ලබමින් තිබෙන ආයතනයක් ඈවර කීරීමට තීන්දු කිරීම ගැන ආන්දෝලනයක් ඇතිව තිබිණි.
මත්තල ජාත්‍යන්තර ගුවන් තොටුපළ ඉන්දීය රුසියා හවුල් ව්‍යාපාරයකට පැවරීමට ද පසුගිය රජය තීරණය කළේය. කෙසේ වෙතත් මේ සම්බන්ධයෙන් වන වාණිජ ගිවිසුම සඳහා නීතිපතිවරයා තවමත් කැමැත්ත ලබා දී නොමැත.
හිටපු ජනාධිපති මහින්ද රාජපක්ෂ මහතාගේ පාලන සමයේදී ඉදිකරන ලද මෙම ගුවන් තොටුපළ ඇමෙරිකානු ඩොලර් මිලියන 209ක පහසුකමකි.
මීට අමතරව , කොළඹ - රත්නපුර අධිවේගී මාර්ගය සහ කුරුණෑගල මහනුවර සහ දඹුල්ල යා කරන මධ්‍යම අධිවේගී මාර්ගයේ තුන්වන සහ හතරේ අදියරේ ඉදිකිරීම් පිළිබඳව නව රජය තවමත් ඉදිරි පියවර සලකා බලා නැත.
එමෙන්ම මධ්‍යම අධිවේගී මාර්ගයේ කඩවත - මීරිගම කොටසේ වැඩකටයුතු චීනයේ EXIM බැංකුව ණය ප්‍රතිව්‍යුහගත කිරීමෙන් පසු තවමත් මුදල් ලබාදී නොමැති බැවින් ඒ අතරමඟ නැවතී ඇත.
