එම තහනම් නියෝගයත් සමග තේරීපත් වූ නිලධාරී මණ්ඩලයට සංගමයේ චංචල හා නිශ්චල දේපළ භාවිතා කිරීම සපුරා තහනම් විය. රජයේ වෛද්‍ය නිලධාරීන්ගේ සංගමය නීතිවිරෝධී ආකාරයට නිලවරණයක් පවත්වන්නට සූදානම් වන බැවින් එය තහනම් කරන ලෙසට සංගමයේ වෙනත් වෛද්‍යවරුන් පිරිසක් ගල්කිස්ස අධිකරණයෙන් ඉල්ලා තිබුණි. අධිකරණය එම ඉල්ලීම පිළිගන්වමින් නිලවරණය තහනම්කොට නියෝගයක් පනවා ඇත.
ඊට එරෙහිව රජයේ වෛද්‍ය නිලධාරීන්ගේ සංගමයේ ක්‍රියාකාරීහු කොළඹ ශ්‍රේෂ්ඨාධිකරණයෙන් නිලවරණය පැවැත්වීමට අවසරය ලබාගෙන ඇත. එම අවසරය මත නිලවරණය ඉකුත් ජුනි 28 වැනිදා පවත්වා තිබේ.
ගල්කිස්ස උසාවිය මගින් පැනවූ තහනම අභියෝගයට ලක්කරමින් උසාවියට අපහාස වන ආකාරයට මෙම නිලවරණය පවත්වා ඇතැයි නිලවරණයට එරෙහි වෛද්‍ය කණ්ඩායම ගල්කිස්ස උසාවියට පෙත්සමක් ඉදිරිපත් කරමින් පවසා ඇත.
මෙහිදී අසාධාරණ හා දූෂිත ක්‍රියා සිදුවූ බවත් එබැවින් නිලවරණය තහනම් කරමින් නියෝගයක් නිකුත් කරන ලෙසත් පෙත්සම මගින් වෛද්‍ය නිලධාරීන් අධිකරණයෙන් ඉල්ලා තිබුණි.
නව නිලධාරී මණ්ඩලයට නිදහසට කරුණු ඉදිරිපත් කිරීම සඳහා ලබන 9 වෙනිදා අධිකරණය හමුවේ පෙනී සිටින ලෙස ගල්කිස්ස උසාවිය මගින් සිතාසි නිකුත් කර ඇත.
