නිති විද්‍යාල ප්‍රවේශය සඳහා පවත්වනු ලබන විභාගය ඉංග්‍රිසි භාෂාවෙන් පමණක් පැවැත්වීමට අගවිනිසුරු මොහාන් පීරිස් මහතා ප්‍රධානත්වය දරන නීති අධ්‍යාපන සභාව විසින් ගෙන ඇති තීරණයට ආණ්ඩුව තුළින්ම දැඩි විරෝධයක් මතු වී තිබේ.
පසුගිය 03 දා පැවැති කැබිනට් රැස්වීමේදී මෙම තීරණය පිළිබඳ සාකච්ඡා කර ඇති අතර එහිදී අදහස් දක්වා ඇති අධිකරණ අමාත්‍යවරයා පවසා ඇත්තේ ඉංග්‍රීසි භාෂාවෙන් ප්‍රශ්න පත්‍ර ලබාදීම වෙනස් නොකරන ලෙසට අගවිනිසුරු මොහාන් පිරිස් මහතා තමාට බලපෑම් කරන බවය.
ඊට විරුද්ධව අදහස් දක්වා ඇති වාසුදේව නානායක්කාර ඇමතිවරයා ප්‍රකාශකර ඇත්තේ සිංහල භාෂාවෙන් පිළිතුරු ලබා දීමට ඉංග්‍රීසි භාෂාවෙන් ප්‍රශ්න ලබා දීම පිළිගත නොහැකි බවත් සිංහල භාෂාවෙන් පිළිතුරු ලබා දීමට සිංහල භාෂාවෙන් ප්‍රශ්න ලබා දිය නොහැක්කේ මන්දැයි යන්නයි.
මෙහිදී අගවිනිසුරුවරයාගේ තීරණය සම්බන්ධයෙන් අමාත්‍යමණ්ඩලයේ බහුතරයකගේ විරෝධය එල්ල වී ඇත. නීති අධ්‍යාපන සභාවේ තීරණ ප්‍රතික්ෂේප කිරීමේ බලයක් අධිකරණ අමාත්‍යවරයාට ඇති බවත් එයට බලපෑම් කිරීමට අගවිනිසුරුවරයාට නොහැකි බවත් එහිදී ඉස්මතු වී තිබේ.
