හෙළ උරුමය ඉදිරිපත් කරන ලද යෝජනාවලිය සම්බන්ධයෙන් ගිවිසුම් ඇතිකර ගැනීමට මේ අවස්ථාවේ කාල වේලාවක් නොවන බවද ජනපතිවරයා පවසා ඇතැයි වාර්තා වේ.

අරලියගහ මැදුරේ පැවැති මෙම සාකච්ඡාව විනාඩි 15කට පමණ සීමා වූ බවද වාර්තා වේ.

ඉදිරිපත් කර ඇති අදාල යෝජනාවලිය සම්බන්ධයෙන් දෙපාර්ශවයට උන්නතියක් අත්පත්කර ගත හැකි හැකිදැයි හෙළ උරුමය ජනපතිවරයාගෙන් කළ විමසුමකදී, ලබන ජනවාරියේ ජනපතිවරණයක් පැවැත්වෙන බැවින් එවැනි සාකච්ඡාවකට කාල වේලාවක් නැතැයි ජනපතිවරයා පවසා තිබේ.

මෙහිදී ජාතික හෙළ උරුමයේ නායක ඕමල්පේ සෝභිත හිමියන් පවසා ඇත්තේ තම පක්ෂයේ ස්ථාවරය තීරණය වන්නේ අදාල යෝජනාවලියට ලැබෙන ප්‍රතිචාරය අනුව බවයි.

ඒ අවස්ථාවේදී අතුරලියේ රතන හිමි දෙසට හැරුණ ජනපතිවරයා ආණ්ඩුවට මුලින්ම අභියෝග කරනු ලැබු උන්වන්සේ විසින් යැයි පවසා තිබේ.

පසුගිය සතියේදී රතන හිමියන් විසින් පිවිතුරු හෙටක් සංවිධානය විසින් සකස්කරන ලද ව්‍යවස්ථා සංශෝධන සම්බන්ධ පිළිගන්නේ දැයි විමසා සිටියේය.

ජාතික හෙළ උරුමයේ යෝජනාවලිය ප්‍රතික්ෂේප කිරීමෙන් පසුව ජනපතිවරයා අදාල සාකච්ඡාවෙන් පිටව ගොස් තිබේ.

මේ සාකච්ඡාවට ජනපතිවරයාට අමතරව සුසිල් ප්‍රේමජයන්ත, ඩලස් අලහප්පෙරුම හා බැසිල් රාජපක්ෂ යන අයද සහභාගීවී සිට ඇත.

ජාතික හෙළ උරුමය විසින් එහිදී ඉදිරිපත් කෙරුණු යෝජනාවලිය ඔවුන් ඉකුත් 19 වැනිදා පැවැත්වු සිය 11 වැනි ජාතික මහා සම්මේලනයේ දී සම්මත කරගනු ලැබිය. 

 දේශපාලන ප‍්‍රතිසංස්කරණ, රාජ්‍ය පාලනය, නීතිය හා අධිකරණය, යහපාලනය, ආර්ථික සංවර්ධනය, සිංහල උරුමය සහ බුද්ධ ශාසන හා ආගමික කටයුතු යන ක්ෂේත‍්‍ර යටතේ කරුණු 33ක් ඊට ඇතුලත්වේ.

කෙසේවවුද පසුගිය ඉරිදා පැවැති එම පක්ෂයේ 11 වැනි සම්මේලනයේදී එම පක්ෂය කියා සිටියේ රනිල් වික්‍රමසිංහ මහතා එක්සත් ජාතික පක්ෂයේ ජනාධිපති අපේක්ෂකයා ලෙස ඉදිරිපත් කරන්නේ නම් ඔවුන්ගේ සහය පොදු අපෙක්ෂකයකුට හෝ තෙවැනි පාර්ශවයකට ලබාදෙන බවයි.