කෙසේවුවද, දඬුගම් ඔයට පැන්න සැකකරුගේ මළ සිරුර මේ වනවිට සොයා ගෙන ඇත. පොලීසිය පැවසුවේ, දඩුගම් ඔයේ කළ සෝදිසියකදී අදාළ මළ සිරුර සොයාගත් බව ය.
මෙම සැකකරු හලාවත ප්‍රදේශයේ පදිංචි සුසන්ත නමැති අයකු බව පැවසේ.
පොලිසිය පරිදි සිද්ධිය මෙසේය.
මෙම සැකකරු මීට මාස කීපයකට පෙර පාදුක්‌ක ප්‍රදේශයේ ලැගුම් හලක කාමරයක්‌ ගෙන නවාතැන් ලබා සිටින අතරතුර එහි සේවකයන්ගේ ජංගම දුරකථන විදේශ ගමන් බලපත්‍ර හා රෙදි ඇතුළු භාණ්‌ඩ කීපයක්‌ සොරාගෙන පලාගොස්‌ තිබී ඇත.
ලැබුණු තොරතුරකට අනුව පාදුක්‌ක පොලිස් ස්‌ථානයේ සේවය කරන පොලිස් කොස්‌තාපල් මහතකු එම ලැගුම් හලේ හිමිකරුවා සමග වෑන් රථයක පැමිණ මෙම සැකකරුව සීදූව ප්‍රදේශයේදී අත්අඩංගුවට ගෙන ඇත.
පසුව සොරාගත් භාණ්‌ඩ දෙන ලෙස පවසමින් මෙම සැකකරු පොලිස් කොස්‌තාපල් මහතා ඇතුළු පිරිසට එම භාණ්‌ඩ තබා ඇතැයි පවසා දඬුගම ඔය අසල බණ්‌ඩාරවෙල මාර්ගයේ ඇති පාළු නිවසකට පිරිස සමග පැමිණ ඇත.
එම නිවස සෝදිසි කළ ද එම නිවස වසර දෙකක පමණ කාලයක්‌ වසා දැමූ නිවසක්‌ හෙයින් නැවත සැකකරුව රැගෙන යැමට සැරසෙන විට අත්අඩංගුවෙන් මිදී දඬුගම් ඔයට පැන පලා යැමට උත්සාහ කරන විට වෑන් රථයේ පැමිණි අයෙක්‌ ඔයට පැන ඔහු අල්ලා ගැනීමට උත්සහ කළද සැකකරු පොරබැද ඔහුව වළක්‌වා ඔය මැදට පීනා ගොස් ඇත.
සැකකරුගේ අත් දෙක ඉදිරිපසට කර මාංචු දමා තිබූ හෙයින් ඔහු අල්ලා ගැනීමට ඔය මැද ආසන්නයටම ගිය පොලිස් කොස්‌තාපල්වරයාටද මාංචු දැමූ අත් දෙකින් පපුව ප්‍රදේශයට පහර දීමෙන් පසු කොස්‌තාපල් ද පසුබැස නැවත ගොඩට පැමිණ ඇත.
පසුව මෙම සැකකරු ඔය මැදට ගොස් ජලයේ නොපෙනී ගොස් ඇත.
අදාළ පොලිස් නිලධාරියා මේ වනවිට රාගම රෝහලේ ප්‍රතිකාර ගනිමින් සිටීයි.
