බදුල්ල, ත්‍රිකුණාමලය සහ මාතර යන දිස්ත්‍රික්කවල ඉදිරි ඡනාධිපතිවරණයට පෙර ජාතික හැදුනුම්පත් ලබාදීම සදහා ජංගම සේවා ක්‍රියාත්මක කිරීමට සැලසුම් කර තිබේ.
මෙහි පළමු අදියර ඔක්තෝබර් 27 වනදා සිට නොවැම්බර් 2 වනදා දක්වා බදුල්ල දිස්ත්‍රික්කයේ ප්‍රාදේශිය ලේකම් කොට්ඨාස රැසකදී පැවැත්විණ.
එහිදී ජාතික හැදුනුම්පත් අහිමි 4281 දෙනෙකුට ජාතික හැදුනුම්පත් ලබාදුන් අතර උප්පැන්න සහතික අහිමිව සිටි 2121 කට සේවා සැපයා දී ඇත.
මෙහි දෙවන පියවර ඊයේ (08 ) කැන්දකැටියෙන් ඇරඹුන අතර , නොවැ 9 - 10 සොරණාතොට, නොවැ 11 ඌව පරණගම , නොවැ 13 හාලි ඇළ, නොවැ 14 හපුතලේ ප්‍රාදේශිය ලේකම් කොට්ඨාසවලදී පැවැත්වීමට නියමිතය.
කැෆේ සංවිධානයේ විධායක අධ්‍යක්ෂ කීර්ති තෙන්නකෝන් මහතා සදහන් කරන්නේ ඉදිරි ජනාධිපතිවරණයට පෙර ජාතික හැදුනුම්පත් ඇතුළු අනන්‍යතා සහතික අහිමි විසිදහසක පමණ පිරිසකට මෙම ජංගම සේවා මගින් සේවා සැපයීමට අපේක්ෂා කරන බව ය.
මෙම ස්ථාන වලදී ජාතික හැදුනුම්පත්, උප්පැන්න සහතික ආදී සියලු අනන්‍යතා පත්‍ර ලබාදීමේ ජංගම සේවා ක්‍රියාත්මක කිරීමට නියමිතව තිබේ. මෙහිදී ජාතික හැදුනුම්පත් නිකුත් කිරීමේදී අවශ්‍ය වන ඡායාරූප කැෆේ සංවිධානය සහ ශ්‍රිලංකා මානව හිමිකම් කේන්ද්‍රය (CHR ) විසින් නොමිලේ ලබා දේ. මෙහිදී සැපයෙන කිසිදු සේවාවක් සදහා මුදලක් අය කිරීමක සිදු නොවේ.
