පසුගිය නොවැම්බර් 5 වැනි දින මහින්ද රාජපක්ෂ මහතා අධිකරණයට යොමු කළ ලිපියෙන් එම නිගමනය නොවැම්බර් 10 වැනි දිනට ඔහුට ලැබෙන්නට සලස්වන ලෙස දන්වා තිබිණි.

ජනාධිපතිවරයාගේ නිල කාලය අවසන්වීමට තවත් වසර දෙකක් තිබියදී මේ පිළිබඳ විවෘත උසාවියේ විවාදයක් පවත්වා නීතිඥවරුන්ට කරුණු ඉදිරිපත් කිරීමට අවස්ථාව ලබාදෙන ලෙස ඉල්ලා ශ්‍රී ලංකා නීතිඥ සංගමයත් ජනතා විමුක්ති පෙරමුණත් අධිකරණයෙන් ඉල්ලා සිටි අතර අධිකරණය ඊට කිසිදු ප්‍රතිචාරයක් නොදැක්වීය.


ජනාධිපතිවරයා අධිකරණයෙන් ඉල්ලා ඇත්තේ උපදේශාත්මක තීරණයක් බවද අදාළ කාරණය පිළිබඳ මහජනයා අතර ඉමහත් උනන්දුවක් ඇති හෙයින් එය විවෘත අධිකරණය හමුවේ විවාදයට ගැනීමට බාධාවක් නොමැති බවත් මීට පෙර අවස්ථා කීපයකදී විවෘත අධිකරණය හමුවේ මෙවන් සිද්ධීන් විවාද කෙරුණු බවත් නීතිඥ සංගමය මෙන්ම විවිධ නීතඥවරු අධිකරණයට පැවැසූහ.


ජනාධිපති මහින්ද රාජපක්ෂ මහතාගේ ලිපිය අධිකරණයට යොමු කළ නොවැම්බර් 5ට පසු දින 6වැනිදා රජයේ නිවාඩු දිනයක් වූ බවද නොවැම්බර් 7 වැනි දින සවස 3.00 දක්වා ලිඛිත දේශන ගොනු කිරීමට කල්දීම ප්‍රමාණවත් නොවන බවද නීතිඥවරු අධිකරණයට මෝසම් මඟින් දැන්වූහ.

 ජනතා විමුක්ති පෙරමුණද අධිකරණයෙන් මෙම ඉල්ලීම කෙළේය.