අසාධ්‍ය තත්ත්වයෙන් කොළඹ ජාතික රෝහලේ දැඩි සත්කාර ඒකකයේ ප්‍රතිකාර ලබමින් සිටිය දී ඊයේ (16) පස්වරුවේ අභාවප්‍රාප්ත වූ ඒ මහතා මිය යනවිට
'සිළුමිණ' පුවත්පතේ උපදේශක කතුවරයා ලෙස කටයුතු කළේය.
ඔහු 2005 වසරේ සිට 2013 වසර දක්වාම 'සිළුමිණ' පුවත්පතේ ප්රධාන කර්තෘවරයා ලෙස කටයුතු කළේය.
ගුරුවරයෙකු වශයෙන් වෘත්තීය ජීවිතය ආරම්භකළ ප්‍රවීණ මාධ්‍යවේදී කරුණාදාස සූරියආරච්චි මහතා පසුව උපාලි පුවත්පත් සමාගමේ දිවයින පුවත්පතේ සේවයට එක්ව තිබෙන අතර අනතුරුව 'සිළුමිණ' පුවත්පතේ ප්රධාන කතුවරයා වශයෙන් කටයුතු කළේය.
ප්‍රවීණ මාධ්‍යවේදියකු වන කරුණාදාස සූරියආරච්චි මහතා කෘති රචනා කිරීම, ගීත නිර්මාණය, කවි නිර්මාණය ඇතුළු විවිධ අංශයන් ඔස්සේ සිය දක්ෂතා පෙන්නුම්කර තිබෙන අතර ‘කසුරිගෙ කොළම', ‘වටරවුම', ‘පකිස්ලන්තය' වැනි තීරු ලිපි ඒ මහතාගේ ජනප්‍රිය නිර්මාණයන් වෙයි.
පසුව උපාලි පුවත්පත් සමාගමෙන් ඉවත් වී ‘සිළුමිණ' පුවත්පතේ කතෘවරයා ලෙස සේවය කළ අතර, සුන්දර නිහතමානී ද මැල් මහතා ‘සිළුමිණ' පුවත්පතේ කතෘධූරය භාර ගැනීමෙන් පසු සූරියආරච්චි මහතා ‘සිළුමිණ' උපදේශක කතෘ පදවියට පත්කරන ලදී.
මේ අතර ඒ මහතා විසින් රචිත ග්‍රන්ථ විශාල ප්‍රමාණයක් ඇති අතර රතු ඉද්ද, මම තවම යමි, කළු දෝංකාරය සහ කන්ද පාමුල ඉන් කිහිපයකි.
කලක්‌ ඉරිදා දිවයින නියෝජ්‍ය කර්තෘ පදවිය මෙන්ම, නවලිය කර්තෘ පදවිය හෙබ වූ ඒ මහතා එක් දරු පියෙකි.
ඔහුගේ දේහය මේ වන විට ගම්පහ, බණ්ඩාරවත්තේ පිහිටි සිය නිවසේ තැන්පත් කර තිබේ.
අභාවප්‍රාප්ත ප්‍රවීන මාධ්‍යවේදී කරුණාදාස සූරියආරච්චි මහතාගේ අවසන් කටයුතු පිළිබඳව පසුව දැනුම්දෙනු ලැබේ.
