ලබන ජනවාරි මාසයේදී පැවැත්වීමට නියමිත ජනාධිපතිවරණය ඉලක්ක කර ජනාධිපති මහින්ද රාජපක්ෂ තමාට මේ ආකාරයේ බොරු චෝදනා එල්ල කරන බව එරික් සොල්හයිම් කියා සිටින්නේ යැයි බී.බී.සී සංදේශය අනාවරණය කරයි.
“මැතිවරණය එළඹෙමින් තිබියදී ජනාධිපති රාජපක්ෂ මා පිළිබඳ බොරු කියනවා. මම හෙට සත්‍ය හෙළි කරනවා” යනුවෙන් හිටපු සාම නියෝජිතවරයා ට්විටර් පණිවුඩයක සඳහන් කර ඇත.
“එයාලා සල්ලි දුන්නා ගිහිල්ලා. නොර්වේ ආණ්ඩුව මේ ගැන පරීක්ෂණ කරන්න ඕනි හරියට නම්. කොටි ත්‍රස්තවාදීන්ට සල්ලි ගෙනහින් දුන්නා. ඒවාට සාක්කි අපි ගාවත් තියෙනවා” යනුවෙන් කුරුණෑගල පැවති ජනහමුවකදී පැමිණ සිටි ජනතාව අමතමින් ජනාධිපතිවරයා කළ ප්‍රකාශයකට එරික් සොල්හයිම් මෙම ප්‍රතිචාරය දක්වා තිබේ.
එල්ටීටීඊ සංවිධානය යුදමය වශයෙන් පරාජය කිරීම කළ නොහැකි බව හිටපු නෝර්වේජියානු සාම නියෝජිතවරයා තමාට පැවසූ බව ජනාධිපති මහින්ද රාජපක්ෂ එම උත්සවයේදී වැඩිදුරටත් පවසා ඇත.
එරික් සොල්හයිම් 1999 සිට 2006 වසර දක්වා ශ්‍රී ලංකාවේ නෝර්වේජියානු සාම නියෝජිතවරයා වශයෙන් කටයුතු කළේය.
ශ්‍රී ලංකාවේ සිදු වූ බවට චෝදනා නැගෙන යුද අපරාධ සම්බන්ධයෙන් විමර්ශන පවත්වන ඕනෑම ජාත්‍යන්තර විනිසුරු මඩුල්ලක් ඉදිරියේ සාක්ෂි ලබාදීමට තමා ඉදිරිපත් වන බව එරික් සොල්හයිම් හිටපු නෝර්වේජියානු සාමනියෝජිතවරයා මීට ඉහතදී පවසා ඇතැයිද බී.බී.සී සංදේශය අනාවරණය කරයි.
ජනාධිපති මහින්ද රාජපක්ෂ සිදු කළ චෝදනා සම්බන්ධයෙන් සඳුදා අදහස් දක්වන බවද හිටපු නෝර්වේජියානු සාම නියෝජිත එරික් සොල්හයිම් සංදේශයට පවසා තිබේ.
