සංචාරක ක්ෂේත්‍රයේ නිරත පිරිස් සමග ඊයේ (16දා) පැවැති සාකච්ඡාවකදී රනිල් වික්‍රමසිංහ මහතා මේ බව පැවසුවේය.
වර්තමාන ආණ්ඩුව සංචාරක ව්‍යාපාරය දියුණු කළ බවට සහ දසලක්ෂ වැනි සංචාරකයා ශ්‍රී ලංකාවට පැමිණි බවට කෑමොර දුන්නත් ලංකාවට පැමිණෙන බොහෝ සංචාරකයන් බස්රථවල ගමන් කරමින් සුළු මුදලක් වියදම් කර රට වටේ ගොස් රටින් පිටව යන බව ඒ මහතා පැවසීය.
යුරෝපයේ ඇතුළු දියුණු රටවල මුදල් හදල් යහමින් ඇති සංචාරකයන් මාලදිවයින වැනි රටවල සංචාරය කරන බවත්, එම පිරිස් මේ රටට ගෙන්වා ගැනීමට කිසිදු වැඩපිළිවෙළක් නොමැති බවත් රනිල් වික්‍රමසිංහ මහතා පවසා සිටියේය.
මේ නිසා ලංකාව වටේ තිබෙන සුන්දර වෙරළ තීරය රැකගනිමින් සහ සමස්ත පරිසර පද්ධතිය රැකගනිමින් මේ රටේ සංචාරක ව්‍යාපාරය දියුණු කිරීමට කටයුතු කරන බවද ඔහු පැවසීය.
නව ආණ්ඩුවක් යටතේ සංචාරක ව්‍යාපාරය 2025 වසර වනවිට රටට ගැළපෙන ආකාරයට සහ දියුණුම මට්ටමකට ගෙන ඒමට අවශ්‍ය සැලසුම් සකස් කර තිබෙන බවද හෙතෙම සඳහන් කළේය.
දැනට සංචාරක හෝටල්වල සේවය කරන සේවකයන්ට ලැබෙන්නේ ඉතාමත් සුළු වැටුපක් බවත්, ඔවුන් වෙත හොඳ වැටුපක් ලබාදීමට අවශ්‍ය සැලසුම් සකස් කර තිබෙන බවත් විපක්ෂ නායකවරයා වැඩිදුරටත් සඳහන් කළේය.
