වසර හයක්‌ තිස්‌සේ ලබා නොදුන් විදුහල්පති උසස්‌වීම් මෙන්ම වසර හතරක්‌ තිස්‌සේ ලබා නොදුන් ගුරු උසස්‌ වීම්ද අද (31 වැනිදා) පෙර ලබාදෙන බව පසුගිය ඔක්‌තෝබර් මස පාර්ලිමේන්තුවට ඉදිරිපත් කරන ලද අයවැයෙන් යෝජනා කෙරිණි.
මෙම යෝජනාව අනුව ගුරු හා විදුහල්පතිවරුන්ගේ උසස්‌වීම් ලබාදීම සඳහා ජංගම සේවා වැඩසටහනක්‌ද අධ්‍යාපන අමාත්‍යාංශය මගින් සැලසුම් කරන ලදී. එහෙත් මේ වන තෙක්‌ ගුරු හා විදුහල්පති උසස්‌වීම් ලබා දී නැතැයි ලංකා ගුරු සංගමයේ ලේකම් ජෝශප් ස්‌ටාලින් මහතා ඊයේ (30 වැනිදා) පැවසීය. ගුරුවරුන් හා විදුහල්පතිවරුන් මෙලෙස රැවටීමට එරෙහිව සියලුම පාසල්වලට බලපාන පරිදි වැඩවර්ජනයක යෙදීමට සැළසුම් කර ඇතැයිද හෙතෙම කීවේය.
සමස්‌ත ලංකා එක්‌සත් ගුරු සංගමය, ස්‌වාධීන ලංකා ගුරු සංගමය, ලංකා ජාතික විදුහල්පති සංගමය, සමස්‌ත ලංකා විදුහල්පති සංගමය ඇතුළු වෘත්තීය සංගම් කිහිපයක්‌ ගුරු හා විදුහල්පති වෘත්තීය සංගම් එකතුවට අයත්ය.
හෙද, පරිපූරක හා අතුරු වෛද්‍ය සේවා වෘත්තිකයින් විසින් ඊයේ (30 දා) ක්‍රියාත්මක කරනු ලැබු දීපව්‍යාප්ත වැඩවර්ජනය හේතුවෙන් රජයේ රෝහල්වල බෙහෙත් නිකුත් කිරීම, විකිරණ පරීක්‍ෂණ, රසායනාගාර පරීක්‍ෂණ සිදු කිරීම, සෞඛ්‍ය ක්‍ෂෙත්‍රයේ මදුරු කීට විද්‍යාත්මක සමීක්‍ෂණයන් සිදු කිරීම ඇතුළු රෝහල් හා සෞඛ්‍ය සේවාවන් රැසක්‌ ඇණ හිට තිබිණි.
