උන්වහන්සේ එම ඉල්ලීම කළේ අරලිය ගහ මන්දිරය ඉදිරිපිට පැවැත්වුන භික්ෂු විරෝධතා ව්‍යාපාරයක දී.
එම භික්ෂු උද්ඝෝෂණයේ අරමුණ උතුරේ දෙමළ ජනතාවට ජනවාරි අට වෙනි දින පැවැත්වෙන ජනාධිපතිවරණයේ දී බාධාවකින් තොරව ඡන්දය පාවිච්චි කිරීමට අවස්ථාව සලසන මෙන් ලෙස රජයට කියා සිටීමයි.
2005 ජනාධිපතිවරණයේ දී මෙන් කොටි ත්‍රස්තවාදීන් යොදා ගෙන උතුරු පළාතේ ජනතාව ඡන්දය දීමෙන් වළක්වා ලීමට යළි කටයුතු නොකරන ලෙසයි භික්ෂූන් වහන්සේ ඉල්ලා සිටියේ.
තමන්ට කොටි ලේබලය ගැසුවත් කොටි සිටින්නේ අරලිය ගහ මන්දිරයේම බවයි භික්ෂු එකමුතු විරෝධතා ව්‍යාපාරයේ දී අදහස් පළ කළ ජාතික සංඝ සභාවේ පාහියන්ගල ආනන්ද සාගර හිමියන් ප්‍රකාශ කළේ.
ජනවාරි අට බිය වැද්දීම්
වැඩිදුරටත් අදහස් දක්වමින් උන්වහන්සේ සඳහන් කළේ ජනාධිපතිවරණය දිනයේ උතුරු පළාතේ ජනතාව බිය වද්දමින් මහජනයා ඡන්ද පොලට පැමිණීම වළක්වා ලීමේ සැලැස්මක් පිළිබඳව දැන ගන්නට ලැබී ඇති බවයි.
‘දෙමළ මිනිසුන් බිය වද්දමින් ඔවුන් ඡන්ද පොළවලට නොපැමිණ සිටීමේ තත්වයක් ඇති කිරීමට හදනවා. අන්න ඒ තත්වය ගැන ලෝකයට කියන්නයි අපි අද අරලිය ගහ මන්දිරය ඉදිරියට ආවේ’ පාහියන්ගල ආනන්ද සාගර හිමියෝ කියා සිටියහ.
සිංහල දෙමළ සහ මුස්ලිම් හැම පුරවැසියකුගේ ම ඡන්ද අයිතිය සහතික කරන මෙන් උන්වහන්සේ ඉල්ලීමක් ද කළහ.
මහජන කැමැත්තට බාධා
එම විරෝධතා ව්‍යාපාරය අමතා කතා කළ ජාතික හෙළ උරුමයේ පස්සරමුල්ලේ දයාවංශ හිමියන් සඳහන් කළේ යුද ජයග්‍රහණයේ සම්පූර්ණ ගෞරවය තනිකර සිය අයිතිය යටතට ගැනීමට කටයුතු කරන ජනාධිපතිවරයා ඊට දායක වූ වෙනත් කොටස් වලට කොටි ලේබලය අලවමින් සිටින බවයි.
‘ජනාධිපතිතුමා උතුරේ ප්‍රජාතන්ත්‍රීය ලෙස බලයට පත් කණ්ඩායම යටපත් කරමින් කොටි ත්‍රස්තවාදයට උඩ ගෙඩි දෙමින් උතුරු පළාතේ ජනයාගේ ඡන්ද අයිතිය වළක්වාලීමට කටයුතු කිරීම ගැන අපි කනගාටු වෙනවා. මහ ජනතාවට සහජීවනයෙන් වාසය කිරීමට ඇති පරිසරය මහජන කැමැත්ත උරගා බලන මොහොතක වැරදි ආකාරයට පාවිච්චි කිරීම ගැන අපි කනගාටු වෙනවා’ පස්සරමුල්ලේ දයාවංශ හිමියෝ පැවසූහ.
විරෝධතා ව්‍යාපාරයට හවුල් වූ භික්ෂූන් වහන්සේ පිරිත් දේශනා කරමින් සත්‍යග්‍රහයක ද නිරත වූහ.
bbc
