හිටපු හමුදාපති ජෙනරාල් සරත් ෆොන්සේකා මහතා 2010 වසරේ යුද හමුදාපති ධුරයෙන් ඉවත්ව ජනාධිපතිවරණයට තරග කිරීම නිසා පැවැති රජයේ ආරක්ෂක බලධාරීන් විසින් ශ්‍රී ලංකා යුද හමුදාවේ මේජර් ජෙනරාල්වරුන් 5 දෙනකු හා ඊට පහළ නිලවලට අයත් උසස් හමුදා ජේ‍යෂ්ඨ නිලධාරීන් 14 දෙනකු හිටපු හමුදාපති ෆොන්සේකා මහතාට හිතවත් අය යැයි සලකා අනිවාර්යය නිවාඩු යවනු ලැබූ අතර ඔවුන්ගෙන් බහුතරය ශ්‍රී ලංකාව හැරදා විදේශ ගත විය.

විදේශගතව සිට ශ්‍රී ලංකාවට පැමිණි එම ජේ‍යෂ්ඨ හමුදා නිලධාරීන් දෙදෙනා පිළිගැනීම සඳහා හිටපු හමුදා නිලධාරීන් පිරිසක් කටුනායක ගුවන්තොටුපොළ වෙත පැමිණ සිටියහ.

මෙහිදී මාධ්‍ය වෙත සිය අදහස් ප්‍රකාශ කළ යුද හමුදා විශේෂ බළකායේ හිටපු සැලැසුම් අධ්‍යක්ෂ මේජර් ජෙනරාල් මහේෂ් සේනානායක මහතා,

හිටපු හමුදාපති ජෙනරාල් ෆොන්සේකා මහතා 2010 ජනාධිපති ධුරයට තරග කිරීමට ඉදිරිපත් වුණාම මහින්ද රාජපක්ෂ ආණ්ඩුව හමුදාවේ ජේ‍යෂ්ඨ ජෙනරාල්වරු 05 දෙනෙක් ඇතුළු උසස් නිලධාරීන් 14 දෙනකු සේවයෙන් පහ කළා. ඒ නිසා අපට රටින් යන්න සිදුවුණා.

අපි රටින් පිට වෙලා වෙනත් රටවල සේවය කළා. මෙවර මැතිවරණයෙන් ගරු මෛත්‍රිපාල සිරිසේන මහතා ජනාධිපති ධුරයට පත්වුණාම නැවත මේ රටේ යහපාලනයක් ඇති වෙයි කියල විශ්වාසයක් ඇති වුණා. තවත් කාලයක් සේවය කරන්න තියෙත්දියි අපව හමුදාවෙන් ඉවත් කෙළේ. එහෙත් තවමත් අපට මවුබිමට සේවය කරන්න හැකියාව තියෙනවා.

mawbima