මේ අනුව එම අමාත්‍යාංශයට අනුයුක්‌තව සිටින රාජ්‍ය නිලධාරීන් වෙනත් අමාත්‍යාංශවලට මාරු කෙරෙනු ඇතැයි ද වාර්තා වේ.
මෛත්‍රීපාල සිරිසේන රජයේ ප්‍රතිපත්ති සම්පාදන සහ ආර්ථික කටයුතු අමාත්‍යවරයා වශයෙන් පත්ව සිටින අග්‍රාමාත්‍ය රනිල් වික්‍රමසිංහ මහතා එම අමාත්‍යාංශය වෙනත් ස්‌ථානයක අලුතින්ම ස්‌ථාපිත කිරීමට අදහස්‌ කර ඇතැයි රජයේ ආරංචිමාර්ගවලින් දැන ගන්නට ඇත.
කොළඹ 10, ටී. බී. ජයා මාවතේ අංක 484 යන ස්‌ථානයේ පිහිටි කුලියට ගත් ගොඩනැඟිල්ලක (එච්. එන්. බී. ටවර් ඉදිරිපිට) ආර්ථික සංවර්ධන අමාත්‍යාංශය පිහිටුවා තිබිණි. නව ආර්ථික කටයුතු ඇමැතිවරයා එම අමාත්‍යාංශයට ගොස්‌ වැඩ භාර නොගෙන වෙනත් ස්‌ථානයක අලුත් අමාත්‍යාංශයක්‌ ලෙස ප්‍රතිපත්ති සම්පාදන හා ආර්ථික කටයුතු අමාත්‍යාංශය පිහිටුවීමට නියමිතව ඇතැයි වාර්තා වේ.
මේ අතර ජනාධිපතිවරණයෙන් පසුව දැනට විදෙස්‌ගතව සිටින හිටපු ආර්ථික සංවර්ධන ඇමැති බැසිල් රාජපක්‍ෂ මහතා එක්‌සත් ජනතා නිදහස්‌ සන්ධානයේ මන්ත්‍රීවරයකු ලෙස තවදුරටත් දේශපාලනයේ නිරත වනු ඇතැයිද, මීළඟ පාර්ලිමේන්තු රැස්‌වීමට සහභාගි වීම සඳහා ඔහු යළි ශ්‍රී ලංකාවට පැමිණෙනු ඇතැයි ද ඒ මහතාට සමීප ආරංචි මාර්ග වලින් දැන ගන්නට ඇත.
- දිවයින
