මදුරන්කුලිය - කඩයාමට්ටේ ප්‍රදේශයේ පිහිටි නිවසක මෙම ජීප් රථය සඟවා තිබී ඇත.
ජීප් රථය සඟවා තබා ගෙන සිට ඇත්තේ පසුගිය වයඹ පළාත් සභාවේ මන්ත්‍රීවරයෙකුව සිටි අයෙකු විසිනි.
ඔහු පසුගිය පළාත් සභාවටද එක්සත් ජනතා නිදහස් සන්ධානයෙන් තරග කළ නමුත් පරාජයට පත් විය.
මෙම ජීප් රථය සම්බන්ධයෙන් වූ තොරතුරු ලැබීමෙන් පසුව මුන්දලම පොලීසියේ නිලධාරීන් 15 වැනිදා රාත්‍රීයේ එම නිවස සෝදිසි කිරීමට ගොස් ඇතත් ගේට්ටු විවෘත කර ගැනීමට නොහැකි වී ඇත.
පසුව නැවත වතාවක් 16 වැනිදා අළුයම 5.00 ට පමණ ගොස් ජීප් රථය සඟවා තිබූ ගෙවත්තේ ගේට්ටු විවෘත කරගෙන ගොස් ජීප් රථය සිය බාරයට ගෙන ඇත.
පසුගිය රජයේ නියෝජ්‍ය ඇමතිවරයෙකු විසින් මෙම ජීප් රථය තමන්ට ලබා දුන් බව නිවස හිමි හිටපු පළාත් සභා මන්ත්‍රීවරයා පොලීසිය හමුවේ පවසා තිබේ.
මෙම ජීප් රථය පසුගිය ජනාධිපතිවරණයේදී මැතිවරණ කටයුතු සඳහා තමන් විසින් යොදා ගත් බව හිටපු පළාත් සභා මන්ත්‍රීවරයා පොලීසිය හමුවේ පවසා ඇත. පොලීසිය විසින් ඔහුගෙන් ප්‍රකාශයක්ද සටහන් කරගෙන ඇත.
තමන් බාරයට ගෙන ඇති ජීප් රථය මේ වන විට මුන්දලම පොලීසියේ ගාල් කර ඇත.
