නීත්‍යනුකූලව ක්රිකට් විකාශන අයිතිය පැවරී තිබුණේ ජාතික නාලිකාවට පමණක්‌ වුවද, අදාළ පනත සංශෝධනය කරමින් පසුගිය රජය විසින් ක්රිකට් තරග විකාශන අයිතිය රාජ්‍ය හෝ ක්‍රීඩා නාලිකාවකට ලබා දිය හැකි බවට නීති ගෙන ආ බව ද දිසානායක මහතා කීවේය. ඒ අනුව පෞද්ගලික නාලිකාවක්‌ වන සී.එස්‌.එන්. නාලිකාවට ක්රිකට් තරග විකාශනය කිරීමේ අයිතිය සම්පූර්ණයෙන් ම පවරා දී තිබූ බව කී දිසානායක මහතා එම නාලිකාව රටේ සියලු ප්‍රදේශ ආවරණය නොකරන නිසා ක්රිකට් ක්‍රීඩාලෝලීන් රැසකට දැඩි අසාධාරණයක්‌ වූ බව ද කීය.
පනතට ගෙන ආ එම සංශෝධනය යළි වෙනස්‌ කර තරග විකාශන අයිතිය නැවත ජාතික නාලිකාව වෙත පවරා ගැනීම පිළිබඳ සොයා බැලීම කරන බව ද ඉදිරි සති දෙක තුළ මේ සම්බන්ධව අවසන් තීන්දුවක්‌ ගන්නා බව ද දිසානායක මහතා පැවැසීය.
එමෙන්ම ජාතික රූපවාහිනියේ කැමරා ඇතුළු උපකරණ සී.එස්‌.එන්. නාලිකාව විසින් භාවිතා කර ඇති බවට ද පැමිණිලි ලැබී ඇතැයි කී දිසානායක මහතා ඒ පිළිබඳව ද සොයා බලන බව කීය.
රාජපක්ෂ පවුලේ පුතුන් වන යෝශිත රාජපක්ෂට හා නාමල් රාජපක්ෂට මෙම රූපවාහිනී ආයතනයේ හිමිකාරිත්වය පවතී. එමෙන්ම ශ්‍රීලංකා ක්රිකට් ආයතනයේ ලේකම් නිශාන්ත රණතුන්ගේ මෙම නාලිකාවේ විධායක නිළධාරියකුවේ.
දිවයින ඇසුරෙණි
