මේ අතර අදාළ නිළවරණය අත්හිටුවීම සඳහා තමන්ට ලැබුණේ වාචික නියෝගයක්‌ බවත්, එසේ නියෝග කිරීමට ක්‍රීඩා ඇමතිවරයා තීරණය කළේ කුමන හේතුවත් මතදැයි තමන් නොදන්නා බව ශ්‍රී ලංකා බැඩ්මින්ටන් සම්මේලනයේ සභාපති සුරාඡ් දන්දෙනිය මහතා කරන ලද විමසුමකට පිළිතුරු දෙමින් පවසා සිටියේය.
'අපි දන්නේ නැහැ ඇයි ක්‍රීඩා අමාත්‍යවරයා එවැනි තීරණයක්‌ ගත්තේ කියලා. නිලවරණය නීති විරෝධී කියලා ලි තව පැමිණිල්ලක්‌ කරපු කෙනෙක් හෝ සංගමයක්‌ තිබෙනවාද, එහෙම නැතිනම් මේ සඳහා හේතුව කුමක්‌ද කියන එක තමයි මටත් තිබෙන ප්‍රශ්නය. ඒ කොහොම වුණත් ඇමතිතුමාට ගරු කරලා අපි නිලවරණය කල්දමන්න තීරණය කළා' යැයි ශ්‍රී ලංකා බැඩ්මින්ටන් සංගමයේ වත්මන් සභාපති සහ නියමිත නිලවරණයේ සභාපති අපේක්ෂක දන්දෙනිය මහතා ප්‍රකාශ කරන ලදී.
අදාළ නිලවරණය අත්හිටුවීමට හේතුව කුමක්‌දැයි ක්‍රීඩා අමාත්‍ය නවීන් දිසානායක මහතාගෙන් කරන ලද විමසීමේදී, නිසි ක්‍රියා පටිපාටිය සපිරීමකින් තොරව නිලවරණ සඳහා ඉල්ලා සිටීමේදී එයට අනුමැතිය දීමේ හැකියාවක්‌ තමාට නැතැයි පවසා සිටියේය.
'මේ අය නිලවරණය තබන්න මගෙන් අනුමැතිය ඉල්ලා සිටියේ දුරකථන ඇමතුමකින්. තම තමන්ගේ හිතවත්කම් මත එහෙම දුරකථන ඇමතුමකින් අනුමැතිය ඉල්ලපු සහ ඒවාට අනුමැතිය ලබාදීපු කාලේ දැන් ඉවරයි.
මම ඒ අයට කීවේ නිලවරණයට මගේ අනුමැතිය අවශ්‍ය නම් එය නිසි පිළිවෙලට කරන්න කියලයි. ඒ පිළිවෙලට ආවොත් මම අනුමැතිය දෙන්න ලැහැස්‌තියි. මම ඒ අයගෙන් අවශ්‍ය ලිපිගොනු වගයක්‌ ඉල්ලා තියෙනවා. ඒවා ලබාදීලා නිසි ක්‍රියාපටිපාටිය අනුගමනය කළොත් මගේ අනුමැතිය ලැබේවී' යැයි නවීන් දිසානායක මහතා අදාළ නියෝගයට කරුණු පැහැදිලි කරමින් අවධාරණය කර සිටියේය.
මේ අතර බැඩ්මින්ටන් සංගමයේ සභාපතිවරයා පැවැති ව්‍යවස්‌ථාව අත්තනෝමතික ලෙස වෙනස්‌ කරමින් මීළඟ නිලවරණය සඳහා ඉදිරිපත්වීමට තිබූ බාධා ඉවත්කරගැනීමේ උත්සහයක යෙදෙන බවට ක්‍ෂේත්‍රයෙන් චෝදනාවක්‌ එල්ලවෙමින් පවතී. ඉකුත්දා සිය ව්‍යවස්‌ථාව සංශෝධනය කිරීමට ශ්‍රී ලංකා බැඩ්මින්ටන් සම්මේලනය කටයුතු කළ අතර ජාතික සංගමයක ව්‍යවස්‌ථාව වෙනස්‌ කිරීමේදී ඒ ආකාරයට ක්‍රියා කළ හැකිද යන ගැටලුව මේ වන විට උද්ගතවී තිබේ.
'නෑ කිසිම ගැටලුවක්‌ නැහැ. මේක ජාත්‍යන්තර බැඩ්මින්ටන් සම්මේලනයේ අනුමැතියට යවලා එහි අනුමැතිය ලබාගෙන කරපු සංශෝධනයක්‌. අනික මේක මගේ තනි උවමනාවට කරපු දෙයක්‌ නෙමෙයි. විධායක කමිටුවේ සියලුදෙනාගේ එකඟත්වයෙන් කරපු දෙයක්‌. ජාත්‍යන්තර බැඩ්මින්ටන් සම්මේලනයේ ඉල්ලීමක්‌ මත කරපු දෙයක්‌. මෙය නිත්‍යානුකූල ව්‍යවස්‌ථාවක්‌.
අද වෙන විට ජාත්‍යන්තර ඔලිම්පික්‌ සම්මේලනය කියන්නේ රාජ්‍ය අංශයේ බලපෑම් අවම වන විදිහට සංගම්වල ව්‍යවස්‌ථා සකස්‌ විය යුතුයි කියලා. ජාත්‍යන්තර ඔලිම්පික්‌ සංගමයෙන්, ඒ ගැන අපව දැනුවත් කරන්න කියලා බැඩ්මින්ටන් ජාත්‍යන්තර විධායකයට උපදෙස්‌ දී තිබෙනවා. ඒ අනුව මෙයට ක්‍රීඩා අමාත්‍යංශයේ අනුමැතිය අවශ්‍යයි කියන එක ගැටලුවක්‌ ' යැයි ඒ සම්බන්ධයෙන් කරන ලද විමසුමේදී සුරාඡ් දන්දෙනිය මහතා පැවසුවේය.
එහෙත් ජාතික සංගමයක්‌ පනතක්‌ බිහිවීමේදී හෝ එය සංශෝධනය වීමේදී ජාතික ක්‍රීඩා පනත සමග නොගැටෙන ලෙසින් පවතීද, එය ක්‍රීඩා අමාත්‍යවරයාගේ බලතල ඉක්‌මවා යන්නක්‌ද, ක්‍රීඩාවේ පරිපාලන රිද්මයට හානියක්‌ වේද යන්න පිළිබඳ ක්‍රීඩා අමාත්‍යංශය හරහා අධීක්‍ෂණය වීමේ ක්‍රමවේදයක්‌ පවතී.
divaina
