ආරක්ෂක අමාත්‍යාංශයේ හිටපු නිලධාරීන් විසින් සිදු කරනු ලැබූ රක්නා ලංකා හා ඇවන්ගාඩ් දුෂිත ගණුදෙනුවට එරෙහිව නීතිපති දෙපාර්තමේන්තුව විසින් කටයුතු කිරීම වැලැක්වීම සදහා බලවත් දේශපාලන කණ්ඩායමක් කටයුතු කරමින් සිටීන බව දුෂණ විරෝධී පෙරමුණ අවධාරණය කර ඇත.
දූෂණ විරොධී පෙරමුණ මේ සම්බන්ධයෙන් අවධාරණය කල කරුණු පහත පලවේ.
දේශපාලන ක්‍රියාකාරිකයින් පිරිසක් ද ඇතුලත් මෙම කණ්ඩායමේ අරමුණ වී ඇත්තේ ඇවන්ගාඩ් සමාගමේ සභාපති නිශ්ශංක සේනාධිපති ඇතුඵ කණ්ඩායමට එරෙහිව මේ වන විට ආරම්භ වී ඇති පරීක්ෂණ කඩාකප්පල් කොට නීතිය ක්‍රියාත්මකවීම වලක්වා ගැනීම.
ජනාධිපති නීතිඥ තිලක් මාරපන මහතා ද ඇවන්ගාඩ් සමාගමේ සභාපති නිශ්ශංක සේනාධිපති වෙනුවෙන් පෙනී සිට නීතිඥ උපදෙස් ලබා දීමට ඉදිරිපත්වී ඇතැයි වාර්තා වේ. මේ වන විට රාජ්‍ය මාධ්‍ය ආයතන පවා යොදා ගනිමින් හිටපු නාවුක හමුදා නිලධාරීන් ද මෙයට එක් වී ඇත.
එම කරුණ සත්‍ය නම්, ආරක්ෂක අමාත්‍යාංශයේ හිටපු නිලධාරීන් සහ ඔවුන්ගේ සමීපතම ජාවාරම්කාරයින් බේරා ගැනීමට මේ වන විට දියත්ව ඇති වැඩපිළිවෙළෙහි ඇති ප්‍රබලත්වය අවබෝධ කොට ගත හැකි වනු ඇත.
ආරක්ෂක අමාත්‍යාංශයේ හිටපු නිලධාරීන් ද, ඇවන්ගාඩ් ආයතනයට ද එරෙහි නීති මගින් කටයුතු කිරීම වැලැක්වීමට ගන්නා කුමන හෝ උත්සාහයක් පරාජය කළ යුතු බව දුෂණ විරෝධී පෙරමුණ දැඩිව අවධාරණය කරයි.
