අතුරු අයවැය විවාදය ආරම්භ කරමින් මුදල් ඇමැතිවරයා එසේ කීය.
2015 වසර සඳහා ඉදිරිපත් කළ අතුරු අයවැය යෝජනා පිළිබඳ විවාදය ආරම්භ කරමින් මුදල් ඇමැති රවි කරුණානායක මහතා මෙසේ කීය.
අනවශ්‍ය වියදම් ඉවත්කොට ජනතාවට සහන දීමටයි අපි අතුරු අයවැයක්‌ ඉදිරිපත් කර තිබෙන්නේ. ප්‍රශ්න දෙක තුනක්‌ තිබෙනවා. නමුත් අපි යම් සාර්ථක පියවරක්‌ ගත්තා කියලා පැහැදිලි වෙනවා. ඊට ලැබෙන ප්‍රතිචාර මගින් අපේ රටේ ආර්ථිකය දැන් කඩාවැටිලා තිබෙනවා. රටේ සම්පූර්ණ ණය බරතාවය රුපියල් ලක්‍ෂ නවයකට විසිතුන් දහසකට වැඩිවෙලා තිබෙනවා.
කලින් කිව්වේ හයලක්‍ෂ ගණනක්‌ පමණ කියලා අපි අතුරු අයවැයෙන් නාස්‌තිකාර හා අනවශ්‍ය වියදම් කපාහැරලා අලුත් ආදායම් අපි උපදවා තිබෙනවා. වාහන සහ මන්දිර බද්ද ගැන යමක්‌ කිව යුතුයි. අපේ රටේ කිසියම් පිරිසක්‌ පසුගිය වසර කිහිපය තුළ සිදුකර ගත් ඉපැයීම්වලින් තමයි. අපි මිලියන 1500 ක් විතර හොයා ගන්නේ. ගෙවල් 1000 ක්, 1500 ක් විතර තමයි මීට අයත් වන්නේ. අපි මෙය සරල කරනවා ගෙවන්න පුළුවන් විදිහට.
අනෙක තමයි වාහන බද්ද. අපි 1000 සී. සී. වාහනවල තීරු බදු අඩු කළා 15% 20% අතර ප්‍රමාණයකින්. යම් විෂමතාවක්‌ තිබ්බා. 120% කින් පමණ එය දැන් අපි 80% පමණ දක්‌වා අඩු කළා. අනෙක්‌ බද්ධ තමයි සුපිරි සමාගම්වලින් අයකරන බද්ද. සී. එස්‌. එන්. වගේ නාලිකා ඒ අය පසුගිය කාලයේ වතුර, විදුලි බිල් ගෙවලත් නැහැ.
ඔවුන් අසීමිත ලෙස මුදල් ඉපැයුවා. ඒ අයට බැරිද රුපියල් මිලියන 1000 ක් ගෙවන්න. අපි මේ පෞද්ගලික තරහක්‌ නොවෙයි පිරිමහන්නේ. අපි දැන් මේ වන විට ප්‍රායෝගිකව හැකි දේවල් ඉදිරිපත් කර තිබෙනවා. මේ තුළින් අයවැය හිඟය 4% ක් වැනි තත්ත්වයකට ගෙනත් තිබෙනවා.
පසුගිය රජය මිලියන 8000 ක් පමණ ඡන්ද වැඩවලට භාවිත කරලා තියෙනවා. මොන ලේකම් කොයි විදිහටද මේ මුදල් වියදම් කර තිබෙන්නේ කියලා අපි කියන්නම්. මේ අයවැය විවාදය ඉවරවෙනකොට ඒ සියලු තොරතුරු කියන්නම්. අපට පම්පෝරි ගසන ආර්ථිකයක්‌ අවශ්‍ය නැහැ. අපේ ජනාධිපති සහ අගමැති රටේ තඹ සතයක්‌වත් දූෂණයට ලක්‌වෙන්න දෙන්නේ නැහැ කියලා කිව යුතුයි.
