විශේෂයෙන්ම සමාජ ශාලා , හෝටල් ආදිය සඳහා මෙලෙස මෙම රූපමය අවවාද නොමැති දුම්වැටි අසුරණයන් රහසි ගතව බෙදා හැරීම දුම්වැටි සමාගම් විසින් සිදු කරමින් පවතී.
ඊයේ දිනයේදී (09) අප වෙත ලැබුණු තොරතුරු මත ඒ සම්බන්ධයෙන් කළ සොයා බැලීමකදී හෙළි වූයේ අදාල ව්‍යාපාරිකයන් විසින් පැරණි අසුරණයන් තවමත් මෙම ස්ථානවලට ලබාදීම සිදුවන බවය.
දුම්වැටි අසුරණයන්හි සියයට 60 ක ප්‍රදේශයක් ආවරණය වන පරිදි පිළිකා රූපමය අවවාද පළ කිරීමට ගත් තීරණය ජනවාරි 01 වැනිදා සිට ක්‍රියාත්මක බව සෞඛ්‍ය අමාත්‍යාංශය නිවේදනය කර තිබිණි.
එම නීතිය ජනවාරි 01 වැනිදා සිට ක්‍රියාත්මක වුවද දුම්වැටි සමාගම් නිෂ්පාදනය කළ දුම්වැටි තොග අවසන් වන තෙක් පොදු සමා කාලයක් ලෙස මාසයක කාලයක් ලබා දුන්නේය.
අනුව පිළිකා රූපමය අවවාද ඇතුළත් දුම්වැටි අසුරණයන් පමණක් වෙළඳ පොළේ අලෙවි කළ යුතු බවත් පරණ දුම්වැටි අසුරණ තොග පවතින්නේ නම් ඒවා වෙළඳ පොළෙන් ඉවත් කර ගන්නා ලෙසට දුම්කොළ සමාගම්වලට දැනුම් දී ඇත.
දුම්වැටි ඉරීම නිසා දිනකට 65 දෙනකු මරණයට පත් වන අතර පිළිකා, හෘදයාබාධ, ආඝාතය යන බෝ නොවන රෝගවලට ගොදුරු වීම ඉහළ ප්‍රවණතාවයක් ඇති බව හෙළිව තිබේ.
එක් දුම්වැටියක විස වර්ග 3000 ක් පමණ අන්තර්ගත වන අතර දුම්වැටි උරන පුද්ගලයකු ළඟ සිටින්නකු එම දුම ආඝ්‍රාණය කිරීමෙන්ම පමණක් එනම් අක්‍රීය දුම්පානයට ලක්වීමෙන් පුද්ගලයන් බෝ නොවන රෝගවලට ගොදුරු වේ.
සම රැලි වැටීම, ඉක්මණින්ම වයසට යෑම, ස්වසන රෝගයන්ට ගොදුරු වීම යනාදිය ද දුම්වැටි භාවිතය නිසා සිදුවේ. තරුණ පිරිස් දුම්පානය සිදු කිරීමෙන් ඔවුන්ගේ ඵලදායිතාව අඩු වන බවත් දුම්වැටි ඉරීම හේතුවෙන් මුඛ පිළිකාවලට බහුතරයක් පිරිස ගොදුරු වන බවත් වෛද්‍ය මතයයි.
