ශ්‍රේෂ්ඨාධිකරණයේ සහ අභියාචනාධිකරණයේ විනිසුරුවරු, සෙසු අධිකරණවල විනිසුරුවරුද, නීතිපති හා එම දෙපාර්තමේන්තුවේ ජ්‍යෙෂ්ඨයන්, ජනාධිපති, නීතිඥවරු, අධිනීතිඥවරු අළුතින් පත්වීම් ලැබූ තිදෙනාගේ සමීප ඥාතීන් හා හිතවත්තු මේ අවස්‌ථාවට සහභාගි වූහ.
අගවිනිසුරු කේ. ශ්‍රී පවන් මහතා මෙහිදී පිරිස අමතමින් පැවසුවේ නව තනතුරට පත්වීමත් සමඟ පැවරෙන රාජකාරී වගකීම් ගැන තමාට හොඳ අවබෝධයක්‌ ඇති බවයි. සහෝදර විනිසුරුවන් සහ වෘත්තීය නීතිඥවරුන්ගේද සහයෝගය ඇතිව සහ හොඳ හිත දිගටම පවත්වාගෙන යමින් එම වගකීම් හැකි උපරිම අයුරින් ඉටුකිරීමට තමා කැපවෙන බවද ඔහු කීවේය.
යුක්‌තිය පසිඳලීම සඳහා ආණ්‌ඩුක්‍රම ව්‍යවස්‌ථාවෙන් උසාවිවල කාර්යභාරය නිසියාකාරව ඉටුවෙන බවට සහ නීතිමය අභිමතය නිසියාකාරව ක්‍රියාවේ යෙදෙන බවට ජනතාව කෙරෙහි විශ්වාසනීයත්වයක්‌ ඇතිවිය යුතු බවත් අධිකරණයේ ස්‌වාධීනත්වය යනු ඒ ඇතිවන ජනතා විශ්වාසය බවත් අගවිනිසුරු ශ්‍රී පවන් මහතා කීවේය.
රජයකට පැවරී ඇති බලතල අත්තනෝමතික හා හිතුවක්‌කාර ලෙස පාවිච්චි නොකළ යුතුය. ඒ නීතියේ ස්‌ථාවරයයි. අපේ ව්‍යවස්‌ථාවන් මූලික පිළිගැනීමක්‌. රජයේ සෑම අංශයකටම බලය ලැබෙන්නේ ව්‍යවස්‌ථාවෙන්. උසාවියට ව්‍යවස්‌ථාවෙන් පැවරී තිබෙන කාර්යභාරය ඒ රජයේ සෑම අංශයක්‌ම ඒ බලතල නිසියාකාරව ඉටුකරනවා. නැතිනම් බලතල සීමාවන් ඉක්‌මවා යනවාද යන්න සොයා බලා තීන්දු තීරණ ප්‍රකාශයට පත් කිරීම බවත් අගවිනිසුරුවරයා පැවැසීය.
ශ්‍රී ලංකා නීතිඥ සංගමයේ සභාපති උපුල් ජයසූරිය මහතා, රටක නීතියක්‌ නැති තත්ත්වයක්‌ පවතින්නේ නම් අධිකරණය මැදිහත්වී එය නැති කිරීමට හෝ පාලනය කිරීමට පියවර ගත යුතු බවයි.
කිසියම් ව්‍යවස්‌ථාපිත ආයතනයක්‌ බල සීමාවන් ඉක්‌මවා හෝ බලය අයුතු ලෙස පාවිච්චි කර කටයුතු කරනවා නම් ඒ වැරදිවලට ඉඩ නොතැබීමද අධිකරණය සතු උතුම් කාර්යභාරයක්‌.
ස්‌වාධීන අධිකරණයක්‌ නැතිනම් සාමානත්වයක්‌ හා සාධාරණ යුක්‌තියක්‌ නැත. පත්වීම් ලබාදීම විනිවිදභාවයකින් සිදුවිය යුතුය. එසේ නැත්නම් විනිසුරුවරුන්ට යුක්‌තිය පසිඳලීම සඳහා යහපත් වාතාවරණයක්‌ ඇති නොවේ.
