එවකට විපක්ෂ නායකව සිටි රනිල් වික්‍රමසිංහ මහතා සහ එවකට ජනාධිපති අපේක්ෂකයකුව සිටි මෛත්‍රීපාල සිරිසේන යන අය විසින් උතුරේ හමුදාව සහ කඳවුරු සියයට හැටක් ඉවත් කරන බවට සඳහන් ව්‍යාජ ගිවිසුමක් තිස්ස අත්තනායක මහතා විසින් සකස් කර එය ප්‍රචාරය කර තිබිණි.
විද්‍යුත් හා මුද්‍රිත මාධ්‍යයන් ඔස්සේ එය ප්‍රචාරය කිරීමටද පියවර ගෙන තිබිණි. එය ප්‍රචාරය කරන අවස්ථාවේ අනුර යාපා මන්ත්‍රීවරයා සහ දයාසිරි ජයසේකර මහතාද එහි සිටි බව කියයි.
එමෙන්ම මේ ව්‍යාජ ගිවිසුම සැකසීම සම්බන්ධයෙන් සිංහල පුවත්පත් කතුවරයකුගෙන්ද ප්‍රශ්න කිරීමට නියමිත බව පොලිස් අරංචි මාර්ග පවසයි.
මේ කූට ලේඛනයේ ඇතුළත් කරුණු මඟින් ජාතීන් අතර අසමඟිය, භේද භින්න වීම ඇතුළු ජනතාව තුළ අස්ථාවර තත්ත්වයක් ඇති කිරීමට උත්සාහ කළේ යැයි රහස් පොලිසිය සැක කරයි.
එම කූට ලේඛනය සම්බන්ධව විපක්ෂ නායකව සිටි රනිල් වික්‍රමසිංහ මහතා කරන ලද පැමිණිල්ලක් මත පරීක්ෂණ පවත්වා අවසානයේ රහස් පොලිසිය තිස්ස අත්තනායක මහතා අත්අඩංගුවට ගෙන තිබිණි.
මෙම ව්‍යාජ ගිවිසුම 1987 ජනාධිපති පත්කර ගැනීමේ පනත යටතේ එන බරපතල වරදක් වෙයි.
එම පනතට අනුව හිතාමතාම එවැනි වරදක් කළ පුද්ගලයකුට නීති මඟින් බරපතළ දඬුවම් හිමි වෙන බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නීතිඥ අජිත් රෝහණ මහතා කීය.
