ජනාධිපතිවරයාගේ ප්‍රථම විදේශ සංචාරය තුළින් විදේශ සංචාරවලට වැය කරන අධික මුදල් ප්‍රමාණය අඩු කිරීමට පියවර ගෙන ඇතැයිද කී හෙතෙම පසුගිය පෙබරවාරි මාසයේදී හිටපු ජනාධිපතිවරයා ඉන්දියාවේ කළ සංචාරයට ඇමැතිවරු සහ නිලධාරීන් 72 ක්‌ සහභාගි වී ඇතැයිද කීය.
එමෙන්ම ඇතැම් විදේශ සංචර සඳහා නිළධාරීන් ට අමතරව පවුලේ හිතවතුන් දෙසියයකට වැඩි පිරිසක් සහභාගී වූ අවස්ථාද තිබිණි. අවසන් වරට ෂීසෙල්ස් දූපතේ කළ සංචාරයට විමල් වීරවංශ ඇමැතිවරයා සහභගී නොවූවද ඒ මහතාගේ බිරිඳවද සහභාගී කරවාගෙන තිබිණි.
විදේශ ඇමැති මංගල සමරවීර, විදුලිබල හා බලශක්‌ති ඇමැති පාඨලී චම්පික රණවක, සෞඛ්‍ය ඇමැති රාජිත සේනාරත්න, නැවත පදිංචි කිරීමේ හා ප්‍රතිසංස්‌කරණ හා හින්දු ආගමික ඇමැති ඩී. එම්. ස්‌වාමිනාදන් යන මහත්වරු ඇතුළු නිලධාරීන් දාහත් දෙනෙක්‌ මෛත්‍රීපාල සිරිසේන මහතා සමග මෙම 15 වැනිදා ඉන්දියාව බලා පිටත්වන බවද හෙතෙම කීය.
ජනාධිපතිවරයා මෙම සංචාරය සිදු කරන්නේ විශේෂිත ගුවන් යානයකින් නොව ඉන්දියාව වෙත ගුවන් ගමන් සිදු කරන සාමාන්‍ය ගුවන් යානයකින් බවද හෙතෙම කීය.
