එසේම නාමල් රාජපක්ෂ මහතා විශ්වවිද්‍යාල ප්‍රතිපාදන කොමිසම හරහා විශ්වවිද්‍යාලයට නොතේරුණු ශිෂ්‍යාවක් සම්බන්ධයෙන් ලිපියක් ලබා දෙමින් විශ්වවිද්‍යාලයකට ඇතුල් කැර ගන්නා ලෙසට කළ ඉල්ලීම සම්බන්ධයෙන් මේ වන විටත් පරීක්ෂණ ආරම්භ කැර ඇතැයි ද එම නිලධාරියා පැවසීය.
පාර්ලිමේන්තු මන්ත්‍රී නාමල් රාජපක්ෂ මහතා අපරාධ විද්‍යාව පිළිබඳව ආචාර්ය උපාධියක් ලබාගැනීම සඳහා ලියාපදිංචියේ සිටම ඉතා බරපතළ විෂමාචාර සිදු කර ඇතැයි දැනට කරන ලද පරීක්ෂණ වලින් සනාථ වී ඇතැයි එම නිලධාරියා සඳහන් කෙළේය.
මෙම අපරාධ පිළිබඳ ආචාර්ය උපාධිය ලබාගැනීම සඳහා රාජපක්ෂ මහතා ශ්‍රී ජයවර්ධනපුර විශ්වවිද්‍යාලයේ ලියාපදිංචි වී ඇති අතර ආචාර්ය උපාධියට පෙර සම්පූර්ණ කළ යුතු දර්ශනපති උපාධිය සම්පූර්ණ නොකොට කෙලින්ම ආචාර්ය උපාධියට ඉදිරිපත්වීමට හැකි ලෙසට හිමිකම් ලබා ගෙන ඇතැයි ද එම නිලධාරියා පැවසීය.
මෙසේ හිමිකම් ලබාදීම සඳහා එම විශ්වවිද්‍යාලයේ හිටපු උපකුලපති මහාචාර්ය එන්. එල්. ඒ. කරුණාරත්න සෙනට් සභාවට යෝජනාවක් ඉදිරිපත් කැර එය සම්මත කැරගෙන එම වරප්‍රසාදය නාමල් රාජපක්ෂ මහතා වෙත ලබාදී ඇතැයි දැනට කරන ලද මූලික පරීක්ෂණ වලින් සනාථ වී ඇතැයිද හෙතෙම පැවසීය.
මෙම කටයුත්තේදී නාමල් රාජපක්ෂ මහතාගේ අධීක්ෂක ලෙස කටයුතු කැර ඇත්තේ මහාචාර්ය කරුණාරත්න වන අතර ඔහු උපකුලපති ධුරයට අමතරව භූගෝල විද්‍යාව පිළිබඳ මහාචාර්යවරයකු වීම මෙම කටයුත්තේ ඇති අක්‍රමිකතාවලට හේතුවී ඇති අතර ඔහු අධීක්ෂණය කැර ඇත්තේ නාමල් රාජපක්ෂ මහතාගේ ආචාර්ය උපාධිය පිළිබඳවීම මෙහි ඇති විෂමාචාරයට තවත් සාක්ෂියක් වී ඇතැයි හෙතෙම සඳහන් කළේය.
පසුගිය සමයේ නීති විද්‍යාලයේ විභාගයට පෙනී සිටිමින්ද නීතිඥ නාමල් රාජපක්ෂ බරපතළ විෂමාචාරයන් කර ඇතැයි හෙළිදරව් වූ අතර එහිදී අධිකරණ ක්‍රියාමාර්ගයක් ගැනීමට උත්සාහ කළ තරුණයාට සිදුවූයේ රට හැර යෑමටය.
dinamina
