යු.එල් 165 දරණ සාමාන්‍ය මගී ගුවන් යානයෙන් ඉන්දියාවේ කොචින් ගුවන්තොටුපළේ සිට පැමිණි ජනාධිපතිවරයා ඇතුළු දුත පිරිස අද පෙරවරු 11 ට පමණ දිවයිනට ළගාවුයේය.
ජනාධිපති ධුරයට පත්වීමෙන් අනතුරුව සිය පළමු විදෙස් සංචාරය ආරම්භ කරමින් ජනාධිපති මෛත්‍රීපාල සිරිසේන මහතා පසුගිය ඉරිදා දිනයේ ඉන්දියාව බලා පිටත්ව ගියේය.එහිදී ඉන්දීය රජය විසින් ජනාධිපතිවරයා ඇතුළු දුත පිරිස මහත් හරසරින් පිළිගනු ලැබුවේය.
සඳුදා දිනයේ ඉන්දීය ජනාධිපති ප්‍රනාබ් මුඛර්ජී මහතා හමුවු ජනාධිපතිවරයා එදින පස්වරුවේ අග්‍රාමාත්‍ය නරේන්ද්‍ර මෝදි මහතා හමුවී ද්වි පාර්ශවික සාකච්ජා පැවැත්වුවේය.
ශ්‍රී ලංකාව ඉන්දියාවේ සමීපතම ආර්ථික මිතුරෙකු බවට පත්කර ගැනීමට ඉන්දීය රජය මහත් උනන්දුවෙන් පසුවන බව ඉන්දීය අග්‍රාමාත්‍යවරයා එහිදී සඳහන් කළේය.
දෙරට අතර ආර්ථික බලශක්ති, ධීවර හා සංස්කෘතික සබඳතා තර කෙරෙන ගිවිසුම් හතරකට ද එහිදී අත්සන් තැබුණි.
කලාපයේ ආරක්ෂක සහයෝගීතාව පිළිබඳ මෙන්ම ඉන්දු ලංකා ධීවර ගැටලුව පිළිබඳව ද දෙරටේ නායකයින්ගේ අවධානය යොමු විය.
සංචාංරය තුළ දී ජනාධිපතිවරයා ඉන්දියාවේ හිටපු අග්‍රාමාත්‍ය මන්මෝහන් සිං මහතා මෙන්ම කොංග්‍රස් පක්ෂ නායිකා සෝනියා ගාන්ධි මහත්මිය ද හමුවී සාකච්ජා පැවැත්වුවේය.
ඊයේ පස්වරුවේ බුද්ධගයාව වැඳපුදාගත් ජනාධිපති මෛත්‍රීපාල සිරිසේන මහතා අද පෙරවරුවේ තිරුපති කෝවිලේ සිදුකළ ආගමික වතාවත්වලින් අනතුරුව සිය සිව්දින නිල සංචාරය අවසන් කළ බව ජනාධිපති මාධ්‍ය අංශය සඳහන් කළේය.
