මීට වසර එක හමාරකට පෙර මෙරටින් පිටව ගොස් ඕස්ට්‍රේලියාවේ වාසය කළ ජයකොඩි මහතා ඊයේ නැවත මෙරටට පැමිණියේය.
පොලිස් මාධ්‍ය ප්‍රකාශකවරයෙක් ලෙස වසර ගණනක් සේවය කළ තමාව හදිසි‍යේ ස්ථාන මාරු කළ බවත්, මාධ්‍ය ප්‍රකාශක ලෙස ස්ථාන මාරු කරන්නට හේතුව පැවැති රජයට අවශ්‍ය පරිදි සත්‍ය වසන් නොකොට මාධ්‍යයට තොරතුරුදීම යැයි විශ්වාස කරන බවත්,ඔහු පැවසීය.
පොලිස් මාධ්‍ය ප්‍රකාශකවරයෙක් ලෙස තමන් දේශපාලනඥයින්ට අවශ්‍ය පරිදි පොලීසිය කටයුතු නොකරන බවට නිකුත් කළ මාධ්‍ය නිවේදනයක් ද තමන්ට මෙවැනි බලපෑම් එල්ල වීමට ප්‍රධාන ලෙස බලපෑ බව ප්‍රිශාන්ත ජයකොඩි මහතා කියා සිටියේය.
පසුගිය රජය සමයේ හිටපු ආරක්ෂක ලේකම් ගෝඨාභය රාජපක්ෂ සහ ඔහුගේ ගෝලබාලයන් ගේ තර්ජන හමුවේ ලංකාවේ ජීවත්වීමට නොහැකි වූ බව හිටපු පොලිස් ප්‍රකාශක ප්‍රිශාන්ත ජයකොඩි පවසයි.
මෙම කාරණා මූලිකව තමාට රට හැර යාමට පවා සිදුවූ බවත් විදේශ ගත වීත් තර්ජන වල නිමක් නොවූ බව පවසන ප්‍රිශාන්ත ජයකොඩි ඔස්ට්‍රේලියාවේදීත් තමාට ජීවිතාරක්ෂාව සඳහා තැනින් තැනට පළා යාමට සිදු වූ බව පැවසුවේය.
අන්තිමේ දී වත්මන් රජය බලයට පත්වීමෙන් අනතුරුව ශ්‍රී ලංකාවේ තත්වයේ වෙනසක් සිදු වූ නිසා සියරට පැමිණි බව පවසන හිටපු පොලිස් ප්‍රකාශක ප්‍රිශාන්ත ජයකොඩි කියා සිටියේ යළි කිසිදාක රට හැර යාමේ උවමනාවක් නොමැති බවයි.
