එමෙන්ම පක්ෂයේ මහජන නියෝජිතයින්ට සිය අභිමතය පරිදි කටයුතු කිරීමට සහ මාධ්‍යයට අදහස් දැක්වීම වැළැක්වීමට නිදහස් පක්ෂ මධ්‍යම කාරක සභාව විසින් තීරණය කර තිබෙන බව නිවේදනයක් නිකුත් කරමින් එම පක්ෂයේ ප්‍රධාන ලේකම් අනුර ප්‍රියදර්ශන යාපා මහතා අනාවරණය කරයි.
මහජන නියෝජිතයින් සිය පෞද්ගලික අදහස් මාධ්‍යයට ඉදිරිපත් කිරීම තුළින් ශ්‍රී ලංකා නිදහස් පක්ෂයේ ප්‍රතිපත්තීන්ට හානි සිදුවන බැවින් මෙම තීරණය ගත් බව අනුර ප්‍රියදර්ශන යාපා මහතා සඳහන් කළේය.
දැනට ශ්‍රී ලංකා නිදහස් පක්ෂය සමග සන්ධාන ගතව සිටින දේශපාලන පක්ෂ සමග එක්ව ඉදිරි මහ මැතිවරණයේ දී පාර්ලිමේන්තුවේ බහුතර බලයක් ලබාගැනීම නිදහස් පක්ෂයේ අරමුණ වී ඇති බව ප්‍රධාන ලේකම්වරයා සිය නිවේදනයෙන් පෙන්වාදෙයි.
දේශපාලන පක්ෂ කිහිපයක සංවිධානත්වයෙන් පසුගිය මස 18 වැනිදා නුගේගොඩ පැවැති රැස්වීමකට සහභාගි වූ බවට එම පක්ෂයේ පාර්ලිමේන්තු හා පළාත් පාලන නියෝජිතයින්ට චෝදනා එල්ල වූයේය.
ලබන මාර්තු 06 වනදා මහනුවරදී ද යළිත් එවැනි රැස්වීමක් සංවිධානය කර ඇති බව සැළවීම සමග ශ්‍රී ලංකා නිදහස් පක්ෂ මහජන නියෝජිතයින් එයට සහභාගිවීම වැළැක්වීම උදෙසා මෙම තීරණයට එළඹි ඇති බව සැලවේ.
