ඊයේ (4දා) දින පාර්ලිමේන්තු සංකීර්ණයේ කමිටු ශාලාවකදී ජනාධිපතිවරයාගේ ප්‍රධානත්වයෙන් මන්ත්‍රි කණ්ඩායම් රැස්වීම පැවැත්විණි.
මේ පිළිබඳ අග්‍රාමාත්‍ය රනිල් වික්‍රමසිංහ මහතා සමඟ සාකච්ඡා කළ බවත් මීළඟ පාර්ලිමේන්තු මහ මැතිවරණයට පෙර, මේ සංශෝධන සිදුකළ යුතු බවත් ඒ සඳහා එක්සත් ජාතික පක්ෂයේ සහාය ලබාදෙන බව රනිල් වික්‍රමසිංහ මහතා කියා සිටි බවත් මෛත්‍රිපාල සිරිසේන ජනාධිපතිවරයා මෙහිදී ප්‍රකාශ කර ඇත.
මැතිවරණ ක්‍රමය වෙනස් කිරීමට අදාළ ප්‍රායෝගික කරුණු පිළිබඳ මැතිවරණ කොමසාරිස්වරයා සමඟ සාකච්ඡා කළ බවත් සීමා නිර්ණය කිරීම් ගැන මිනින්දොරු දෙපාර්තමේන්තුවට අදාළ වගකීම් කෙටි කාලයකදී සිදුකළ හැකි බවට දැනුම් දී ඇති බවත් මෙහිදී ප්‍රකාශ වී තිබේ.
මැතිවරණ ක්‍රමය කේවල හා සමානුපාතික මිශ්‍ර ක්‍රමයක් යටතේ සිදුකිරීම සඳහා දිනේෂ් ගුණවර්ධන මහතාගේ ප්‍රධානත්වයෙන් රැස්වූ මැතිවරණ ක්‍රමය සංශෝධනය කිරීමේ පාර්ලිමේන්තු කාරක සභාවේ වාර්තාව පදනම් කර ගැනීමටද එක්සත් ජාතික පක්ෂයේ එකඟතාව පළ වී ඇත. මේ අනුව මේ සංශෝධනය සිදුකිරීමේ කාර්යයන් සොයාබැලීම සඳහා කමිටුවක් පත්කිරීමටද නියමිත අතර මාස 2ක් ඇතුළත මේ සංශෝධන දෙකම පාර්ලිමේන්තුවට ඉදිරිපත් කර අනුමැතිය ලබාගැනීමට නියමිතය.
විපක්ෂ නායක නිමල් සිරිපාල ද සිල්වා, විපක්ෂයේ ප්‍රධාන සංවිධායක ඩබ්ලිව්. ඩී.ජේ. සෙනෙවිරත්න යන මහත්වරු ඇතුළු ශ්‍රී ලංකා නිදහස් පක්ෂයේ මන්ත්‍රිවරු මේ අවස්ථාවට සහභාගි වූහ.
කෙසේ නමුත් මෙම නව ඡන්ද ක්‍රමය සම්බන්ධයෙන් ජනතා විමුක්ති පෙරමුණ ඇතුළු සුළු පක්ෂවල විරෝධය පළ වී තිබේ.
මව්බිම ඇසුරිණි
