අප කළ විමසීමකට පිළිතුරු දෙමින් ඒ මහතා වැඩිදුරටත් මෙසේ ද පැවසීය.
ශ්‍රී ලංකා නිදහස් පක්ෂයේ මධ්‍යම කාරක සභාවේ දී ගත් තීන්දුවට පිටුපා මහනුවර පැවැති දේශපාලන රැලියට සහභාගි වූ මන්ත්‍රීවරුන් සම්බන්ධයෙන් විනය පරීක්ෂණ පවත්වනු ලබන්නේ ශ්‍රී ලංකා නිදහස් පක්ෂයේ අනන්‍යතාව හා පක්ෂයේ සමගිය සුරැකෙන පරිද්දෙන් බව ද මන්ත්‍රීවරයා පැවසීය.
එබැවින් තම පක්ෂයේ තීන්දු තීරණ ගන්නේ රනිල් වික්‍රමසිංහ මහතාට හා එක්සත් ජාතික පක්ෂයට කඩේයන ‘කාඩ්බෝඩ් වංශලා’ට වුවමනා ආකාරයෙන් නොවන බැවින් එවැනි අය කලබල නොවිය යුතු බව ද ඩිලාන් පෙරේරා මන්ත්‍රීවරයා පැවසීය.
ජාතික ආණ්ඩුවක් පිහිටුවීම සම්බන්ධයෙන් සාකච්ඡා කිරීම සඳහා පක්ෂ සභාපති ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් පක්ෂයේ මහ’ ලේකම්, ප්‍රධාන සංවිධායක හා ජාතික සංවිධායක ඇතුළත් සිව් පුද්ගල කමිටුවක් පත්කර තිබේ. ඒ අනුව ජනාධිපතිවරයා විදේශ සංචාරය නිමවා පැමිණි වහාම එක්සත් ජාතික පක්ෂය සමග ඒ සම්බන්ධයෙන් සාකච්ඡා කරන බවත් මේ වන විට එම සාකච්ඡා සඳහා අවශ්‍ය මූලික කටයුතු සූදානම් වෙමින් පවතින බවත් ඩිලාන් පෙරේරා මහතා පැවසීය.
-rivira
