බෙල්ලන්විල වේරැස්ස ගඟ සංවර්ධන ව්‍යාපෘතිය විවෘත කිරීමේ උත්සවයට සහභාගී වූ මේ සංගීත කණ්ඩායමට ඉඩම් ගොඩකිරීමේ සංස්ථාවෙන් රුපියල් ලක්ෂ 270ක්ද, ශාන්ත ජෝන් මාළු වෙළෙඳපොළ ප්‍රතිනිර්මාණය කරමින් විවෘත කළ අවස්ථාවේදී පැවැති උත්සවයේදී නාගරික සංවර්ධන අධිකාරිය මඟින් මේ ගායන ශිල්පීන් දෙදෙනාටම රුපියල් ලක්ෂ 130ක් වශයෙන් ගෙවා ඇතැයිද හෙළිදරව් වී ඇත.
මේ අනුව මේ සංගීත කණ්ඩායමට උත්සව අවස්ථා දෙකකදී රුපියල් ලක්ෂ හාරසියයක මුදලක් ගෙවා ඇති බවට අනාවරණය වී ඇත. පසුගිය පාලන සමයේදී රජයේ උත්සව අවස්ථා රැසක් මෙම ගායකයන් දෙදෙනාගේ සමාගමට ලබා දී තිබු අතර ඒවෙනුවෙන් අධික මුදලක් ගෙවූ බවටද එවකට චෝදනා එල්ලවී තිබිණි.
පසුගිය වකවානුවේදී නාගරික සංවර්ධන, ජලසම්පාදන හා ජලාපවහන අමාත්‍යාංශයට අයත් මේ ආයතනවල සිදුව ඇති දූෂණ හා වංචා රැසක් සම්බන්ධයෙන් මේ ආයතන වල ජාතික සේවක සංගමයේ නියෝජිතයන් විෂයභාර ඇමැතිවරුන්ට පැමිණිලි කර ඇත.
එමෙන්ම මේ සියලු ආයතන වල සිදුව ඇති දූෂණ හා වංචා සම්බන්ධයෙන් විධිමත් පරීක්ෂණයක් සිදු කිරීමටද විෂය භාර ඇමැතිවරුන් තීරණය කැර ඇත. එමෙන්ම පසුගිය ජනාධිපතිවරණය සමයේදී ඉඩම් ගොඩකිරීමේ සංස්ථාව නාගරික සංවර්ධන අධිකාරිය ඇතුළු ආයතන ගණනාවක සිදුව ඇති දූෂණ, වංචා, මුදල් අවභාවිතයන් රාජ්‍ය සම්පත් මැතිවරණයට යොදා ගැනීම ආදිය සම්බන්ධයෙන් කරුණු රැසක් ජාතික සේවක සංගමය හෙළිදරව් කර ඇත.
