තායිලන්තය, මලයාසියාව, මොන්ගෝලියාව, ලාඕසය සහ කාම්බෝජය ආදී කලාපයීය රටවල් ගණනාවක පාර්ලිමේන්තු මන්ත්‍රිවරුන් විශාල පිරිසක් ඊයේ ඇරැඹි තුන් දින චාරිකා වැඩමුළුවට සහභාගි වූහ.
දුම්වැටිවලින් සිදුවන අන්තරාදායක බව පිළිබඳව දුම්වැටි බහාලන පැකැට්ටුවේ මුහුණත ඉඩ ප්‍රමාණයෙන් සියයට අසූවක් (80%) වෙන් කළ යුතු බවට තමා පාර්ලිමේන්තුවට ඉදිරිපත් කළ යෝජනාව ඒකමතිකව සම්මත වුවද ඊට එරෙහිව දුම්වැටි සමාගම් පැවරූ නඩුව සම්බන්ධයෙන් අධිකරණයෙන් තීන්දුව ලැබුණේ වෙන්කළ යුතු ඉඩ ප්‍රමාණය සියයට හැටක් විය යුතු බවට සහ එම තීන්දුව ක්‍රියාත්මක විය යුත්තේ 2014 දෙසැම්බර් 31 සිට බවට යැයිද ඇමැතිවරයා කීය.
පාර්ලිමේන්තුවේ මහජන නියෝජිතයන් ඒකමතිකව දුන් තීන්දුවක් මෙසේ නොසලකා හැරීම ගැන බලවත් ලෙස කනගාටුව පළ කළ සෞඛ්‍ය ඇමැතිවරයා ප්‍රසිද්ධ ස්ථානවල දුම් ඉරීමද බාලවයස්කාරයන්ට දුම්වැටි අලෙවි කිරීමද තහනම් කෙළේ දුම්පානය නැවැත්වීමට යැයි කීය.
ලෝකයේ කෝටි සංඛ්‍යාත ජනතාවක් රෝගීන් බවට පත් කෙරෙන දුම්කොළ වෙළෙදාම ලෝකයේ සුළු පිරිසක් ධනවතුන් කෙරෙන ඉතාම ලාභදායී ව්‍යාපාරයක් බවද ඔහු පැවැසීය.
දුම්කොළ ව්‍යාපාරිකයන් තම ව්‍යාපාරය පවත්වා ගෙන යෑමට පාර්ලිමේන්තු නියෝජිතයන් පවා තම දැලට කොටුකර ගැනීමට උත්සාහ දරන බවද එසේ නොහැකි වූ කල රාජ්‍ය තාන්ත්‍රික ඉහළ නිලධාරීන් බිළි බා ගැනීමට කටයුතු කරන බවද ඇමැතිවරයා කීය.
මත්ද්‍රව්‍ය දුම්කොළ මාරයා පලවා හැරීමට ලෝකවාසීන් සියලු දෙනාම අත්වැල් බැඳගත යුතුව ඇතැයිද සෞඛ්‍ය ඇමැතිවරයා පැවැසීය.
(මව්බිම)
