'උතුරු පළාත් ජාත්‍යන්තර සබදතා මධ්‍යස්ථානය' ලෙස මේවන විට හඳුන්වනු ලබන මෙම ගොඩනැගිල්ලේ ඉතිරි අත්‍යාවශ්‍ය වැඩකටයුතු හමාර කොට එය මහජන ප්‍රයෝජනය උදෙසා ලබාදිය යුතුය යන මෛත්‍රීපාල සිරිසේන ජනාධිපතිවරයාගේ යෝජනාව අමාත්‍ය මණ්ඩලය විසින් ඊයේ (23)අනුමත කළේය.
මෙය මෙය මහින්ද රජපක්ෂ පවුලේ පෞද්ගලික වුවමනාවන් වෙනුවෙන් ඉදිවන බව පසුගිය සමයේ අනාවරණය විය. එහිදී ජනාධිපති මහින්ද රාජපක්ෂ මහතා නිවේදනයක් නිකුත් කරමින් පවසා සිටියේ මෙය ජනාධිපති මන්දිරයක් නොව ජාත්‍යන්තර සම්බන්ධතා මධ්‍යස්ථානයක් බවය.
උතුරු නැගෙනහිර ප්‍රදේශවලට එන විදෙස් රාජ්‍ය නායකයින් හා දෙස් විදෙස් අමුත්තන්ගේ ප්‍රයෝජනය පිණිස ජනාධිපති ලේකම් කාර්යාලය යටතේ මෙය ඉදිකෙරුණු බව හිටපු ජනාධිපතිවරයා පැවසුවේය.
මෙම කැබිනට් තීරණ දැනුම්දීමේ අවස්ථාවෙදී කැබිනට් ප්‍රකාශක අමාත්‍ය රාජිත සේනාරත්න මහතා පවසා සිටියේ පිහිනුම් තටාක දෙකක් සහිතව ඉදිවූ මෙය ජාත්‍යන්තර සබදතා මධ්‍යස්ථානයක් බව පැවසූවත් වෙනත් කිසිම රටක ඇති ජාත්‍යන්තර සබදතා මධ්‍යස්ථානයන්හි පිහිනුම් තටාක නොමැති බවත් එවැන්නක් ජාත්‍යන්තර සබදතා මධ්‍යස්ථානයක් වන්නේ කෙසේද යනුවෙනි.
මෙම මන්දිරය (උතුරු පළාත් ජාත්‍යන්තර සබදතා මධ්‍යස්ථානය) වර්ග අඩි 113,00 ක වපසරියක ඉදිවන අතර මෙම ගොඩනැගිලි සංකීර්ණයේ 70% ක පමණ වැඩ මේ වන විට නිමවී ඇත.මෙහි ඉදිකිරීම් සදහා අනුමත ඇස්තමේන්තුව රුපියල් මිලියන 1,587.8 වන අතර මේ දක්වා සිදු කර ඇති වියදම මිලියන 966.3 කි.
මෙහි අත්‍යාවශ්‍ය ඉතිරිවැඩ කොටස් පමණක් ඉංජිනේරු සැළසුම් අනුව අවසන් කර එම ගොඩනැගිලි සංකීර්ණය රාජ්‍ය, අර්ධ රාජ්‍ය හෝ වෙනත් සුදුසු ආයතනයකට පවරා මහජන ප්‍රයෝජනයට යොදා ගැනීම පිණිස ජනාධිපති මෛත්‍රීපාල සිරිසේන මැතිතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.
උමා ඔය බහුකාර්ය සංවර්ධන ව්‍යපෘතියෙහි ඉදිරි කටයුතු සිදු කළ යුතු ආකාරය සම්බන්ධයෙන් නිර්දේශ ඉදිරිපත් කිරීම සදහා අමාත්‍ය මණ්ඩල අනුකාරක සභාවක් පත් කිරීම පිණිස මහවැලි සංවර්ධන හා පරිසර අමාත්‍ය වශයෙන් මෛත්‍රීපාල සිරිසේන මහතා ඉදිරිපත් කළ යොජනාවටද කැබිනට් මණ්ඩල අනුමැතිය හිමිවී ඇත.
