රාජ්‍ය සමාගම් සහ ඒ යටතේ ඇති ආයතන සිය ගණනක් පසුගිය වකවානුවේ ගණනය කළ නොහැකි තරම් වූ අති විශාල මුදල් සම්භාරයක් කෝටි ගණනින් ගසා කා ඇති බව හෙළිදරව් වී ඇති සමයක ඒ පිළිබඳ සොයා බලා අවශ්‍ය පියවර ගැනීම කාලීන අවශ්‍යතාවයකි.
රාජ්‍ය සමාගම් 200 කට වැඩි ප්‍රමාණයක් සහ ඒවා යටතේ ඇති උප ආයතන සිය ගණනක් මෙසේ බරපතළ ලෙස මූල්‍ය ගසාකෑම් සිදුකළත් මෙතෙක් කාලයක් රජයේ විගණනයට ඒවා හසුකර ගැනීමේ බලයක් නොතිබුණි. රාජ්‍ය සමාගම් පනත යටතේ ලියාපදිංචි වූ සමාගම් විගණනයෙන් ඉවත් කර තිබීම ඊට හේතු වී ඇත.
මෙම ජාතික විගණන පනත ගෙන ඒමෙන් බරපතළ මූල්‍ය ගසාකෑම් වහාම නතර කිරීමට විගණකාධිපතිවරයාට අධිබාර කිරීමේ බලය හිමිවෙයි. තවද එම පනතින් අනවශ්‍ය ලෙස ලබාගත් මුදල් යළි අයකර ගැනීමේ බලය ද විගණකාධිපති දෙපාර්තමේන්තුවට හිමිවෙයි.
