තවදුරටත් අදහස් දක්වමින් මුදල් අමාත්‍යවරයා පැවසූයේ ලලිත් ඇතුළත්මුදලි මහතා හෙළි පෙහෙළි කළ නිවැරදි මාවතේ ගමන් කරන තමන්ට මේ රටේ මුදල් අමාත්‍යවරයා ලෙස ඉදිරිපත් කළ ප්‍රථම අයවැයෙන්ම මහපොළ ශිෂ්‍යත්වය රු. 5000/- දක්වා ඉහළ නැංවීමට යෝජනා කිරීමට හැකිවීම මහත් සතුටක් බවය.
එදා මෙදා තුර බිහි වූ රට රටට වැඩ කරන බෙහෝ දෙනෙකුට මහපොළ ශිෂ්‍යත්වය පිටිවහලක් වූ බවත් එම මෙහෙවර පෝෂණය කරමින් ඉදිරියට රැගෙන යාම කෘතහස්ත දේශපාලනඥයකු වූ ලලිත් ඇතුළත්මුදලි මහතාට කරන කළගුණ දැක්වීමක් බව මුදල් අමාත්‍ය රවී කරුණානායක මහතා පැවසුවේය.ඔහු මේ අදහස් පැවසූයේ
ඊයේ (23) දිනට යෙදී තිබුණු දිවංගත ලලිත් ඇතුළත්මුදලි මහතාගේ 22 වැනි ගුණානුස්මරණ උත්සවය අමතමිනි.
කොළඹ රාජකීය විදුහල අසල ඇති ලලිත් ඇතුළත්මුදලි මහතාගේ පිළිරුව අසල පැවති ප්‍රධාන අනුස්මරණ උත්සවය මුදල් අමාත්‍ය රවී කරුණානායක මහතාගේ ප්‍රධානත්වයෙන් පවත්වනු ලැබීය.
එහිදී මුදල් අමාත්‍යවරයා මෙසේද ප්‍රකාශ කළේය.
‘‘ එක්සත් ජාතික පක්ෂය ආලෝකවත් කළ ලලිත් ඇතුළත්මුදලි වැනි රට ගැන හිතා වැඩ කළ නායකයන් රටට අහිමි විමේ ප්‍රතිවිපාක ශ්‍රී ලංකාව අද භුක්ති විදිමින් සිටිනවා. දුප්පත්, පොහොසත් භේදයකින් තොරව දක්ෂතා ඇති රටේ සෑම දරුවකුටම නිදහසේ උසස් අධ්‍යාපනය ලැබීමට අවශ්‍ය ආධාර වැඩ සටහනක් මහපොළ ශිෂ්‍යත්වය නමින් බිහිකළ මේ අති දක්ෂ දේශපානඥයාගේ යුග මෙහෙවර රටට ආදර්ශයක්''
ලලිත් ඇතුළත්මුදලි මහතාගේ සෙවණැල්ල තුළින් ගමන් කළ තමන් ඔහුගේ මෙහෙවර වඩාත් හොඳින් ඉදිරියට ගෙන යාමට කටයුතු කරමින් සිටින බවත් මුදල් අමාත්‍ය රවී කරුණානායක මහතා එහිදී ප්‍රකාශ කළේය.
