ශ්‍රී ලංකාවේ වෙළඳ නාවික කටයුතු පිළිබඳ අධ්‍යක්ෂ අජිත් සෙනවිරත්න මහතා පවසන්නේ මෙම ගැටළුව දැනටමත් ශ්‍රී ලංකාවේ රුසියානු තානාපති කාර්යාලයට ඉදිරිපත් කර ඇතිබව සහ එය ඉතා ඉක්මනින් විසඳීමට පියවර ගන්නා බවයි.
මෙම ගැටලුව සම්බන්ධයෙන් ශ්‍රී ලංකාවේ වරාය සහ නාවික අමාත්‍යංශය සමඟද සකච්ඡා කර ඇති අතර එම නෞකාවේ මෙරට නියෝජිතයින් සමඟ සකච්ඡා සිදුකර මෙය ඉක්මනින් විසඳීමට කටයුතු කරන බව අජිත් සෙනෙවිරත්න මහතා පවසයි.
මීට අමතරව රුසියානු නාවික කටයුතු පිළිබඳ අධිකාරියද ජාත්‍යන්තර ප්‍රවාහන සේවකයන්ගේ සම්මේලනය (ITF) හරහා මෙම ගැටලුවට මැදිහත්වීමට නියමිත බව පැවසේ.
එසේම රුසියාවේ සාගර විද්‍යා ආයතනය චෝදනා කරන පරිදි මෙම නෞකාවේ අයිතිකරු සහ දේශීය නියෝජිත අතර පවතින මතබේදයක් හේතුවෙන් එහි සේවකයන් මෙලෙස රඳවාගෙන සිටීම මානව හිමිකම් උල්ලංඝනය කිරීමකි. මෙම නෞකාව කොළඹ වරායට පැමිණ ඇත්තේ අත්‍යවශ්‍ය අලුත්වැඩියා කටයුත්තක් සඳහා 2013 වර්ෂයේ ඔක්තෝම්බර් මාසයේදීයි.
