සමාජ ශාලාවන් හී මත්ද්‍රව්‍ය අළෙවි කිරීම සම්බන්ධයෙන් වැටලීම සුරාබදු දෙපාර්තමේන්තුව සතු කටයුත්තක් වුවත් එම නිලධාරීන් නොමැතිව පැමිණි පොලීසිය එම සමාජ ශාලාව තුල නියමිත කාලය පසුවී නිතිවිරෝධී ලෙස බීම අළෙවි කළ බවට චෝදනා කර මෙම අත් අඩංගුවට ගැනීම සිදු කර ඇත. මෙම සමාජ ශාලාව සුරේන්ද්‍ර වසන්ත පෙරේරා හෙවත් කැරොකේ වසන්තට අයත් බව කියවෙන අතර මෙලෙස පොලීසිය වටලා ඇත්තේ පොලීසියට කප්පම් දීම ප්‍රතික්ෂේප කිරීම නිසා බව ද පැවැසේ. එම ආරංචි මාර්ග පවසන්නේ පසුගිය කාලයේ පොලීසියේ සිට දේශපාලන ප්‍රධානින් දක්වා කප්පම් ගෙවමින් ව්‍යාපාර කිරීමට සිදුවූවත් වත්මන් පාලනය තුලදී එසේ කිරීමේ අවශ්‍යතාවයක් නැති බවත් මේ නිසා පොලීසියට එරෙහිව නීත්‍යානුකූල පියවර ගන්නා බවත්ය.
සාමාන්‍යයෙන් සමාජශාලා සඳහා මත්පැන් විකිණීමේ බලපත්‍ර නිකුත් කෙරෙන්නේ රාත්‍රී 11.00 පසුව ඒ අවසන් කළ යුතු බවට නියෝගයක් සමඟය. නමුත් මෙම සමාජ ශාලාවට නිකුත් කර ඇති බලපත්‍රය අනුව පසුදින පාන්දර 2.00 දක්වා අලෙවි කටයුතු කිරීම අනුමැතිය හිමිව තිබේ. එය මහින්ද විජේසේකර අමාත්‍යවරයකු සිටි අවධියේදී ඔහුගේ සහයෙන් ලබාගත් බලපත්‍රයක් බවද පැවැසේ. පොලීසිය පැමිණ ඇත්තේ රාත්‍රී 12.20 ට පමණය.
