ජනවාරි 08 වැනිදා නව රජය බිහිවීමෙන් පසු එ.ජා.ප.ය පත්කළ පළමු ආසන සංවිධායකවරයා වන්නේ සන්නස්ගල මහතාය. ඔහු මීට පෙර අවස්ථා කිහිපයකදීම දේශපාලනයට සම්බන්ධ වන බවට කටකතා පැතිරුණද ඒ කිසිදු අවස්ථාවකදී ඔහු දේශපාලනයට සම්බන්ධ නොවීය.
1994 දී ශ්‍රී ලංකා නිදහස් පක්ෂයෙන් හපුතලේ ආසනයට තරග කිරීම කළ ආරාධනය ඔහුට ලැබුණු පළමු ආරාධනය වූ අතර, එයින් පසුව මහරගම සහ අවිස්සාවේල්ල ආසන සංවිධායක වශයෙන් දේශපාලනයට එක්වීමේ ආරාධනා ලැබී තිබේ.
2010 පළාත් සභා මැතිවරණයේදී සබරගමුව මහ ඇමති අපේක්ෂකයා ලෙස එක්සත් ජාතික පක්ෂයෙන් තරග කිරීමට ආරාධනා ලැබුණු අවස්ථාවේදී එ.ජා.ප.යේ යෝජනාව බාරගන්නෙත් නෑ... ප්‍රතික්‍ෂේප කරන්නෙත් නෑ.. යනුවෙන් ඔහු කළ ප්‍රකාශය දේශපාලන ක්‍ෂේත්‍රයේ දැඩි කතාබහට ලක්විය.
පසුගියදා එ.ජා.ප. නායක රනිල් වික්‍රමසිංහ මහතා අතින් ආසන සංවිධායක ධුරය භාරගත් සන්නස්ගල මහතා ඒ පිළිබඳව මෙසේ අදහස් දැක්වීය.
දිවංගත ලලිත් ඇතුලත්මුදලි මහතා රත්මලාන සංවිධායකවරයා ලෙස කටයුතු කිරීමෙන් පසුව මේ ආසනයට එ.ජා.ප.යෙන් ස්ථිර සංවිධායකවරයෙකු සිටියෙ නෑ. දේශපාලන යෝධයෙක් නියෝජනය කළ මේ ආසනයේ සංවිධායකවරයා වීම මට සුවිශේෂීයි.
උපුල් ශාන්ත සන්නස්ගල රචිත පොත් 15 ක් එළිදැක්වීම උත්සවය සන්න අරගලය නමින් පසුගිය දිනක පැවති අවස්ථාවේදී අගමැතිවරයා විසින්ද ඔහු දේශපාලනයට පැමිණෙන බවට ඉගියක් ලබාදුන්නේය.
