වත්මන් ආණ්‌ඩුව ස්‌ථාපිත කළේ දින සියයක කාලයකට පමණක්‌ බවත් එහි කාලය මේවනවිට ඉක්‌මවා ගොස්‌ ඇති බවත් එහෙයින් තවදුරටත් ආණ්‌ඩුව පවත්වාගෙන යාමට සදාචාරාත්මක අයිතියක්‌ නොමැති බවත් හෙතෙම කියා සිටියේය.
එහෙයින් පාර්ලිමේන්තුව විසුරුවා හැර මහ මැතිවරණයට අනිවාර්යයෙන්ම අවතීර්ණ විය යුතුව ඇති බවත් දිසානායක මහතා වැඩිදුරටත් සඳහන් කළේය.
එමෙන්ම ජාතික විධායක සභාව තවදුරටත් රැස්‌වීම අර්ථ විරහිත ක්‍රියාවක්‌ බැවින් කළ යුත්තේ එය අහෝසි කිරීම බව ද ඔහු පවසයි.
'ජාතික විධායක සභාව පිහිටුවූයේ දින සියයක්‌ සඳහා. එම කාල පරිච්ඡේදය දැන් අවසන්. ජාතික විධායක සභාවට පැවරී තිබූ කාර්යභාරය සහ ඊට නියමිත කාලය දැන් අවසන්. එම නිසා එය තවදුරටත් රැස්‌වීම අර්ථ විරහිතභාවයට පත්ව තිබෙනව. ජාතික විධායක සභාවට පැවරී තිබූ කාර්යයන් වූයේ දහනව වැනි සංශෝධනය ගෙන ඒම. එය අවසන්. තොරතුරු දැනගැනීමේ පනත සහ විගණන කොමිසම් පනත පිළිබඳ විධායක සභාවේ කාර්යයන් අවසන්. දැන් එය අනුමත කිරීම ආණ්‌ඩුවේ කාර්යයක්‌. මන්ත්‍රීවරුන්ගේ ආචාර ධර්ම පද්ධතිය විධායක සභාවට ඉදිරිපත් කර මාස දෙකකට ආසන්නයි. දැන් එය සම්මත කර ගැනීම ආණ්‌ඩුවේ කාර්යයක්‌. ඡන්ද ක්‍රමය වෙනස්‌ කිරීම ජනාධිපතිවරයා ප්‍රමුඛ පක්‍ෂ නායක රැස්‌වීම හමුවේ තිබෙනවා. එම නිසා එම කාර්යය විධායක සභාවට අයත් නෑ.
විධායක සභාව තවදුරටත් රැස්‌විය යුත්තේ එහි කාර්යභාරය සමාලෝචනය කර අවසන් කිරීම සඳහා පමණයි '
divaina
