දහනව වෙනි ආණ්ඩුක්‍රම ව්‍යවස්ථා සංශෝධනය අප්‍රේල් 28දා පාර්ලිමේන්තුවේදී සම්මත වුවද එදින විපක්ෂයේ සංශෝධන කිහිපයක් ඉදිරිපත් වීම නිසා ඒවාද ඇතුළත් කොට යළි පනත් කෙටුම්පත සැකසීමට සිදුවිය. එම නිසා සංශෝධිත පනත කථානායකවරයා වෙත ඉදිරිපත් කිරීම ප්‍රමාද වූ බව අධිකරණ ඇමැති විජයදාස රාජපක්ෂ මහතා ප්‍රකාශ කළේය.
ඒ අනුව නීති කෙටුම්පත් දෙපාර්තමේන්තුව සකස් කළ සංශෝධිත පනතේ සිංහල පිටපත පෙරේදා (12) පාර්ලිමේන්තුවේ මහ ලේකම්වරයාට බාර දී ඇත. එහි දෙමළ හා ඉංග්‍රීසි අනුවාදයන් ලද පසු හෙට දිනයේදී කථානායකවරයාගේ අත්සන සඳහා යොමු කිරීමට පාර්ලිමේන්තු මහ ලේකම් කාර්යාලය කටයුතු යොදා ඇතැයිද පාර්ලිමේන්තු ආරංචි මාර්ග සඳහන් කරයි. කථානායකවරයා මීට අත්සන් තැබිමෙන් පසු පනත බලාත්මක වනු ඇති අතර ඒ අනුව ව්‍යවස්ථාදායක සභාව ඇතුළු ස්වාධීන කොමිෂන් සභා ස්ථාපිත වනු ඇත.
