මහජන දේපළ අවභාවිතා කිරීම යටතේ හිටපු අමාත්‍යවරයාට සහ එම නඩුවේ සෙසු සැකකරුවන්ට අධිචෝදනා පත්‍ර භාර දෙන බව එම ආරංචි මාර්ග වැඩි දුරටත් සඳහන් කළේය.
හිටපු අමාත්‍ය බැසිල් රාජපක්ෂ, ආර්ථික සංවර්ධන අමාත්‍යාංශයේ හිටපු ලේකම් නිහාල් ජයතිලක, හිටපු දිවි නැඟුම අධ්‍යක්ෂ ජෙනරාල් ආර්. කේ. කේ. රණවක හා දිවි නැඟුම කලාප අධ්‍යක්ෂ බන්දුල තිලකසිරි යන මහත්වරුන් මේ වනවිට දිවි නැඟුම අරමුදල් අයුතු ලෙස පරිහරණය කිරීමේ චෝදනා යටතේ රිමාන්ඩ් බන්ධනාගාර ගත කර සිටී. බැසිල් රාජපක්ෂ මහතා සහ එම අමාත්‍යාංශයේ සෙසු ප්‍රධානීන් තිදෙනා ලබන 20 වැනිදා යළිත් වරක් කඩුවෙල මහේස්ත්‍රාත් අධිකරණය හමුවට ඉදිරිපත් කිරීමට නියමිතය.
පොලිස් මූල්‍ය අපරාධ විමර්ශන ඒකකය මේ චෝදනා සම්බන්ධයෙන් විමර්ශන සිදු කළ අතර පැය 10කට අධික කාලයක් ප්‍රශ්න කිරීමකින් අනතුරුව බැසිල් රාජපක්ෂ මහතා පසුගිය අප්‍රේල් 22 වැනිදා රිමාන්ඩ් භාරයට පත් කෙරුණි. සිය සොහොයුරාගේ ඡන්ද ව්‍යාපාරයේ කටයුතු වෙනුවෙන් දිවි නැඟුම අරමුදලේ මුදල් යොදා ගැනීම සහ සම්මන්ත්‍රණයක් පැවැත්වීම සඳහා රුපියල් බිලියන 70ක මුදලක් වැය කිරීම ආදී චෝදනා හිටපු අමාත්‍යවරයාට එල්ලවී තිබිණි.
හිටපු ජනාධිපති මහින්ද රාජපක්ෂ මහතාගේ ජනාධිපතිවරණ මැතිවරණ ව්‍යාපාරය භාර ප්‍රධානියා වශයෙන් කටයුතු කළේ ද බැසිල් රාජපක්ෂ මහතාය. මැතිවරණ පරාජයෙන් දින කිහිපයකට පසුව ඔහු ඇමෙරිකා එක්සත් ජනපදය බලා පිටත්ව ගියේය.
dinamina
