විල්පත්තු රක්ෂිතයේ මුස්ලිම් ජනතාව පදිංචි වී ඇති බවට අන්තවාදීන් චෝදනා එල්ල කළද එහි සැබවින්ම පදිංචි වී ඇත්තේ හම්බන්තොටින් පැමිණි සිංහල ජනයා බව ඔවුන් පවසයි. එසේම සිංහල ජනතාවට නැවත පදිංචි කිරීමේදී අක්කර 03ක ඉඩම් ප්‍රමාණයක් ලබාදුන්නත් මුස්ලිම් ජනතාවට ලබාදෙන්නේ අක්කර බාගයක කොටසක් බව මුස්ලිම් කවුන්සිලය මෙම ලිපියේ පවසා තිබේ. මෙම කරුණ කෙරෙහි ජාතිවාදී දෘෂ්ඨිකෝණයකින් නොබලා එම ප්‍රශ්නය දෙස සාධාරණව බලන ලෙස ඔවුන් ජනතා විමුක්ති පෙරමුණෙන් ඉල්ලා තිබේ.
පසුගිය කාලයේ මඩු රක්ෂිතය හා විල්පත්තු උතුරු අභය භූමියට ආසන්නව පිහිටා ඇති කල්ලාරු වනාන්තරයේ මාර්ග ඉදිකිරීම හා නැවත පදංචි කිරීම වෙනුවෙන් යැයි කියා වනාන්තර විනාශ පිළිබඳ විශාල කතා බහක් ඇතිවිය. එම පදිංචි කිරීම් සම්බන්ධයෙන් චෝදනා එල්ල වුවේ රිෂාඩ් බදුර්දීන් ඇමතිවරයා වෙතයි. නමුත් පසුව මෙම චෝදනා පරිසර රැකගැනීමේ වුවමනාවෙන් ඔබ්බට ගොස් ඇතැම් ජාතිවාදී සංවිධාන වල වුවමනාවන් අනුව ජාතිවාදී ස්වරූපයක් ගන්න ලදී. විල්පත්තු අභයභූමියේ සිදුවන වන සංහාරය, අනවසර පදිංචි කිරීම්, දැව ජාවාරම් පිළිබඳ සොයා බැලීම සඳහා ජනතා විමුක්ති පෙරමුණේ නායකයන්ද පරිසර සංවිධාන සමඟ එක්ව විල්පත්තු වනයේ පසුගියදා (09) සංචාරයක නිරත විය.
